ترجمة مواقع الإنترنت

الجمعة، يوليو 27، 2007

السلام عليكم
مش عارف ابتدى منين و ازاى
بس هاقول حاجة
غيابى المرة دى طولت شوية و ده لظروف سفرى و عدم الاستقرار اللى انا فيه
انا الحمد لله بخير و مافيش اى حاجة تضايق و لا حاجة الحمد لله و ان شاء الله نتواصل من خلال حواديت و تعليم
المهم ادعولى بالتوفيق
و انا عرفت من سؤال الناس عنى و قلقهم عليا ان فيه ناس اهتمت بأمرى و غيابى كان مهم عندهم
بجد اشكرهم من كل قلبى
الى ان نلتقى فى بوست جديد
اعتذر عن عدم الرد على التعليقات و عدم اجابة الاسئلة فى مدونة تعليم لكن ان شاء الله الظروف تتحسن و ارجع من تانى

الخميس، مايو 31، 2007

حاجة تغيظ

فيه حاجات كتير بتغيظك صح؟
زى ايه؟
زى مثلا لما تكون بتاكل اكلة حلوة و فجأة تحس ان فيه حاجة فى بقك لفة حوالين سنانك و بعدها جسمك يقشعر و تمد ايدك بسرعة تمسك الحاجة دى و تلاقيها شعرة وسط الاكل
احساسك ايه ساعتها؟
جسمك قشعر صح؟
يع
لما تكون متشيك و رايح مقابلة مهمة و يا دوب تلحق معادك و فجأة تيجى عربية سريعة من جنبك تترطش علي هدومك شوية طينة مين الشارع هتعمل ايه؟
او تتزحلق بسبب الطين اللى مالى الشوارع
مجارى طافحة
ماسورة مية مكسورة
او واحد راشش بذمة شوية قدام دكانه او قهوته قال يعنى ناقصة
و الا لما تكون ماشى و لابس هدوم العيد اللى انت لسة جايبها و دافع فيها فلوس كتير يجى عيل راكب عجلة يروح قاطعلك البنطلون و الا ينتشلك الجاكتة و يبصلك بكل برود و يمشى
و لو نفدت من العربية و قدرت تلحق هدومك من الواد ده و تكون معدى تحت بلكونة فى نفس اللحظة اللى واحدة ست بترمى مية الغسيل منها والا واحد واقف فى البلكونة و كان لسة مخلص قروصة سجاير و صدره مليان بلغم و بيتف
ممكن طبعا تلحق نفسك و تجرى من تحت البلكونة و تتلزق فى الحيطة علشان ماتجيش عليك حاجة و بترمى بعنيك كده لقيت يافطة مكتوب عليها بخط مش باين احترس من البوية
او و انت بتسند على الحيطة لزقت فى ايدك حاجة لزجة و بتبص لقيتها كميه كبيرة من مخلفات مناخير واحد عنده زكام
ولو انت عندك قوة ملاحظة و سرعة استجابة خرافية فى اللحظة اللى انت بتجرى من تحت البلكونة و تقفز بسرعة مدهشة و لمحت البوية و بواقى المناخير ع الحيطة فتميل جانبا ثم تدور دورة افقية بجسدك و تركل الحائط بقدميك و تدور حول نفسك بمهارة مذهلة يحسدك عليها ابطال الاوليمبياد و كل هذا يحدث فى اقل من الثانية و تطأ قدمك على الارض و ............ و يتزحلق رجل المستحيل و يقع على ضهره و لما يقوم يشوف ايه اللى زحلقه يكتشف ان رجله جت على حاجة مكلكعة لونها بنى فى الغالب ذات رائحة نفاذة كان صاحبها لسة واكل كرشة و محلى بشربة كوارع
هتلحق نفسك بطريقة شيطانية من كل الحاجات دى و تجرى بعزم ما فيك علشان تخرج من الشارع المنيل ده و خرجت فعلا لقيت الدنيا ضلمت فجأة و الدنيا اتملت ريحة مألوفة عارفها كل واحد فى مصر كويس قوى
الريحة هى ريحة المجارى اللى احنا متعودين عليها!!!!! و ده معناه ايه ده؟
معناه ايه؟ انت لسة ما استوعبتش؟
انت وقعت فى بلاعة مجارى هو انت مش من مصر و الا ايه؟
بس هنفترض انك برضه سريع البديهة و قبل ما تبلعك المجارى زى ما بلعت غيرك قدرت تتشعبط فى حلق البلاعة و تطلع و الحمد لله بدون خساير هى بس كل الحكاية ان ريحة البارفان اتغيرت شوية و لون هدومك اتغير شويتين بس الحمد لله جت سليمة
وانت بالمنظر ده ماشى مبلول ( مش من البلاعة من الخضة) حسيت ان فيه حد مسك فيك و من مسكته اكيد قلت انه صديق قديم وحشته عايز يخدك بالحضن
احب اقلك ان الاحساس ده مش هيدوم اكتر من ثانية لأن اللى مسكك مش بنى ادم ده سلك عريان سلك كهربه عريان
فيه فى البلد بن جميل قوى بينفع فى الحالات اللى زى كده
مش ليك
ده لناس لابسين اسود بس
استنى شوية ده لحسن حظك ان الكهربه قاطعة من المنطقة انت متعرفش و الا ايه؟ ما هى كل يوم بتقطع فى بيتكو اشمعنى ده يعنى
خرجت من الشارع ده و ..... برضه لقيت واحد مسكك من ورا
ايوة المرة دى مش هنخدع دة مش واحد صاحبى عايز ياخدنى بالحضن ده اكيد سلك تانى عريان زى الاولانى و المرة دى فيه كهربا لانى سامع صوت التسجيل فى القهوة
هوه فعلا مش واحد صاحبك وحشته و لا حتى بنى آدم المرة دى طلع كلب
ايوة كلب
كلب سعران هبرك من ورة و طلعت تجرى بس هتروح فين دى دماغه زى الجزمة مش هايسيبك مش كفاية حتة البنطلون اللى فى بقه
بس الحمد لله انت سريع فى الجرى و الكلب اصلا جربان ومش لاقى ياكل مش هيقدر يحصلك
بس هتعمل ايه يا حلو فى جيش الكلاب اللى جاى من اول الشارع يجرى ناحيتك وفى مقابلتك على طول
يا عم ايه اللى نزلك اصلا ما كنت تقعد فى بيتك بدل ما تتبهدل كده
يا سلام الحمد لله البيت اهه هطلع جرى اخد دش
اى
ايه ده
دى السلمة المكسورة فى بيتكو مش عارفها؟
خد بالك
طلعت و دخلت و دخلت الحمام و قلعت هدوك و حطيت الصابون على وشك و جسمك و خلاص هتستحمى و تخلص من كل البلاوى اللى انا وقعتك فيها من اول الموضوع و انت بتفتح الدش ......ايه ده ده مفيش مية
ايوة ما هى المية قاطعة انت مش عارف انها بتقطع كل يوم؟
طب و العمل ؟ قول لامك تسخنلك مية على البوتاجاز علشان الدنيا برد
و
ماما سخنيلمى مية
الانبوبة فاضية و بتاع الانابيب لسة مجاش
و الحل
استنى شوية فيه واحد جاى اهه فى اول الشارع هنندهله
ندهته الست و طلع لغاية فوق و بتديله الخمسة جنيه قلها ايه ده يا ست الانابيب غليت بقت بعشرة جنيه؟
بعشرة جنيه ليه؟ هى لحمة؟ هى خمسة جنيه مفيش غيرها
يفتح الله يا ست فيه ناس كتير هتخودها
يللا امشى غور جاتكه البلاوى
يا ماما
ما انت سامع بنفسك ازاى اديله عشرة جنيه استحمى بمية ساقعة بقى
------------------------------------------------
بمبى بمبى بمبى بمبى
الحياة بقى لونها بمبى

الأحد، مايو 13، 2007

Questions أسئلة

أرجو الاجابة
ما هو نوع الكمبيوتر الذى تعمل عليه؟
ما نوع استخدامك له؟
ما هو نظام التشغيل الذى تستخدمه؟
هل هو المفضل لديك ام انه جرت العادة على استخدامه؟
هل جربت أنظمة أخرى؟
ما هى؟
و هل ترى فارقا كبيرا بين الاثنين؟
Please answer:
What kind of your computer pc/mac or what?
How do you use it?
What kind of Operating System that you use?
Are you interesting of it or you usually use it?
Did you tried another operating system else?
And what is it?
Do you see any difference between the both?

A Question سؤال

لماذا لا نستطيع عمل مجلد (فولدر يعنى ) فى نظام الويندوز بإسم
con
why we cat`t create a folder in Microsoft Windows by name " con " ?

***
انتظرونى فى السؤال القادم
wait me for the next question

الجمعة، مايو 11، 2007

Microsoft vs Linux




سؤال:
لماذا يرتبط معظم الناس بمايكروسوفت و برامجها و لا يغيرونها؟ و ان غيروها فسرعان ما يعودون اليها؟
الاجابة: و ذلك لاحد الاسباب الاتية او كلها مجتمعة
الحاجز النفسى
و هو ارتباط معظم المستخدمين بهذه الشركة و برامجها منذ تعرفهم على مجال الكمبيوتر و ارتباط الكمبيوتر فى ذهن الكثيرين بمايكروسوفت و نظام تشغيلها الويندوز
الملفات
اتخذ الناس فكرة خاطئة بأن الملفات المكتوبة على نظام الويندوز لا تعمل على غيره
و هذه الملفات مثل
ملفات وورد و اكسل و اكسس و باوربوينت و غيرها و يمكن ذكر معظم الامتدادات كالاتى
ملفات وثائقية مثل
doc , txt , pdf , rtf , xls , csv , xml , ppt , dwg , dxf
ملفات صور مثل
bmp , jpg , png , tif , gif , wmf , psd , ico
ملفات صوتيات و فيديو و حركة
avi , asf , mpg , rm , ram , swf , mov , mid , wav , mp3 , wmv
و غيرها من الامتدادات المختلفة الخارجة من معظم البرامج
و للاختصار نستطيع ان نقول ان كل الامتدادات تعمل على نظام لينكس عدا امتدادات التشغيل مثل
exe , com , bat
و حتى هذه ظهر لها برنامج اضافى للينكس ليستطيع تشغيلها
ملحوظة
تستطيع الدخول على حسابك الخاص فى الياهو مسنجر و الهوتميل و الاى سى كيو من خلال برنامج واحد فى نظام اللينكس كما يمكنك الدخول على برامج الدردشة من خلاله
الالعاب
Games
نعترف بأن جميع الالعاب الشيقة هى التى تعمل على نظام الويندوز و لنظام اللينكس العابه الخاصة به و هى كلها مجانية , و تعد بالمئات و من المحتمل ان تطرح الشركات المنتجة للالعاب نسخ خاصة بنظام لينكس و جدير بالذكر انه يتوافر نسخة خاصة بنظام لينكس من لعبة كويك او الزلزال الشهيرة
Quake
***
يمكنك تحميل نظام تشغيل لينكس مجانا من خلال الانترنت مع عشرات الالاف من البرامج و الالعاب المفيدة المجانية مع التمتع بخدمة التحديث الدورية
يدعم نظام اللينكس اللغة العربية بشكل كامل سواء فى قراءة الحروف العربية او تعريب لغة واجهته
تتعدد النسخ من نظام اللينكس حسب الشركة المنتجة له و لكن انصح بنسخة يوبونتو
ubuntu
او
kubunto
و هى عبارة عن اسطوانة واحدة فقط اما باقى البرامج فمن خلال التحديث عن طريق الانترنت
التحميل مجانى فقط انسخ ملف الايزو على اسطوانة ثم اجعل الكمبيوتر يبدأ منها
طريقة تنزيل النظام سهلة جدا و لكى تتمتع بوجوده جانب الويندوز يجب ان تخصص له جزء خالى من القرص الصلب و سوف تفاجأ بتشغيل النظام كاملا من القرص قبل التنزيل على القرص الصلب و ما عليك الا ان تختار

Install

من على سطح المكتب

يتفوق نظام اللينكس على نظام الويندوز فى عدة اوجه
ثبات اكثر
امان اكثر
غير مستهلك للنظام
اذ لا يتطلب مواصفات عالية مع احتفاظه بنفس مزايا الويندوز
مجانى
اذ انه لا يتطلب اى ترخيص من اى جهة و كذلك يمكنك اعادة نسخه و توزيعه بمعرفتك دون الرجوع الى الشركة المنتجة و ذلك ليس فى جميع النسخ لان هناك شركات تحتكر انتاجها منه مثل شركة نوفل التى تحتكر النسخة الشهيرة و القوية سوسى و كذلك شركة ريدهات و التى تحتكر النسخة بنفس المسمى
و هناك نسخ مجانية و قوية فى نفس الوقت و من اشهرها فيدورا و يوبونتو و نوبيكس و هى نسخة للتشغيل من خلال الاسطوانة مباشرة دون الحاجة لتنزيله على القرص الصلب
و اخيرا لن يجعلك تلهث وراءه بالتحديث الدورى للاجهزة مثلما تفعل مايكروسوفت
معذرة للتطويل و اخر مرة اطول يا جماعة

الأربعاء، مايو 09، 2007

حاجة ببلاش كده



قعدت افكر ازاى اخلص من الويندوز؟
ازاى اخلص من مايكروسوفت و من كل برامجها؟
طيب و شغلى و ملفاتى؟
ملفات وورد و اكسل؟
ملفات صور و صوتيات؟
فيديوهات؟
ملفات اوتوكاد - تصميمات معمارية؟
فيه بديل لدول
Internet Explorer
Media Player
Word
Excel
Power Point
Access
طيب فيه بديل للويندوز نفسه؟
ايوة فيه بديل
اللينوكس
linux
اللينوكس نظام تشغيل يشبه الى حد كبير نظام الويندوز الا ان اللينوكس نظام مجانى تماما و مفتوح المصدر اى ان كل مبرمج يريد التطوير فيه فلديه الحق كاملا فى الاطلاع على مصدره و التعديل عليه
اذ ان حقوق الملكية لهذا النظام ليست حكر على احد عكس الويندوز الذى يملك حقوق ملكيته شركة مايكروسوفت و هى الوحيدة التى لها الحق فى التطوير و التعديل عليه و لكى تستطيع استخدام نظام الويندوز يجب عليك شراء ترخيص من الشركة المالكة و الذى يصل احيانا الى 100 دولار امريكى او ما يعادل 500 جنيها مصريا
طب ليه تدفع اصلا لما ممكن تشتغل ببلاش
طيب و ملفاتى؟
جميع الملفات المذكورة اعلاه تستطيع فتحها على نظام لينوكس بكل سهولة و بدون اى خطأ
كما ان الشركات صاحبة البرامج الجاهزة اتجهت فى الاونة الاخيرة لطرح برامجها التى تعمل على اللينوكس
و ليه اصلا عايز تخلص من مايكروسوفت و الويندوز بتاعها؟
اولا ان مايكروسوفت ويندوز بها عيوب كتيرة تبدأ من رسائل الخطأ اللى بتطلع بدون مناسبة
ثانيا ان معظم الفيروسات موجهة لنظام ويندوز يعنى من النادر جدا تلاقى فيروس على اللينوكس
ثالثا معدل الاستقرار و الامان فى نظام لينوكس اكبر من نظام ويندوز
رابعا انه شرعا و قانونا لا يحق لك نسخ البرامج المملوكة الا باذن صاحبها و طبعا اذنه يعنى هاتدفع
و للمزيد عن اخطاء مايكروسوفت و ليه انا عايز اخلص منها اضغط هنا
يتبع

الاثنين، مايو 07، 2007

انت فاهمنى؟

من شوية اشتريت كتاب اسمه القواعد الاساسية للنحو و الصرف و ده كان عندى من زمان و ضاع منى للاسف
قعدت ادور عليه لغاية ما لقيته بالصدفة عند واحد بيشترى الكتب القديمة و بيبعتها للمحرقة
المهم
فتحت الكتاب و لقيت موضوع فى اخره اسمه علامات الترقيم
بيحكى عن العلامات زى النقطة و الشرطة و الاقواس
افتكرت تعليق لاحد المدونين مش فاكره فى مدونة تانية مش فاكرها برضه
تعليقه زعل صاحب المدونة و رجع علق تانى و اعتذر وقال انه ما كانش يقصد و الكلام ما بينقلش الصوت لانه ما فيهوش تون و نغمة و كده
كان كلامه جميل و معبر
فعلا الكلام المكتوب ما فيهوش تون مافيهوش نغمة يتعرف بيها قصد المتكلم ان كان زعلان و الا فرحان و الا متضايق و الامبسوط
طب ايه الحل؟
بسيطة
علامات الترقيم يا اخواننا
يعنى مثلا علامة التعجب
!
من اسمها يتعرف استخدامها
تستخدم للانفعالات النفسية و للكلام المثير للدهشة
و مثلا الشرطتان
- -
او القوسين
()
و يفيد فى الكلام الاعتراضى و هو الكلام اللى مش تبع الموضوع او اللى بيفسر كلمة او اى حاجة مش فى سياق الموضوع
اعتقد ان فى ظل استخدامنا للكمبيوتر و لادوات الكتابة الجاهزة بقينا ممكن نستخدم طرق تانية للتعبير مع علامات الترقيم زى التلوين او تكبير الخطوط او امالتها او عمل الخط عريض
يعنى انا لو عايز ازعق و اقول ياعالم ياهووووه ممكن اكتبها بحرف كبير زى كده
ياعالم ياهووووه
و كمان لونته بلون احمر غامق للدلالة على الغضب او الانفعال
و لو عايز اهمسلك ابقى اصغر الخط زى كده وش وش وش و كمان لونته بلون هادى للدلالة على الهدوء و السكون

الأربعاء، مايو 02، 2007

عمرو خالد مجرد داعية و انا سلفى

قبل ما ارد ع التعليقات ع الموضوع اللى فات حبيت اوضح شوية حاجات كدة ع الماشى
انا ما بقلش انى ما باسمعش غير عمرو خالد انا باسمع و باتعلم من ناس كتير و مش باقول عمرو خالد قال عمرو خالد عمل و اتحجج بيه انا ليا الصح من قرآن و سنة و اللى هايخالفهم هاضرب بكلامه الحيطة مهما كان هذا الانسان
قلت فى البوست ان العلماء يخطئون فما بالك بمن دونهم ماكانش قصدى انى اعتبر عمرو خالد منهم انا اعتبرته بمن دونهم
احب اوضح حاجة
ان حلقات عمرو خالد و غيره من الدعاة ان قبلتم انه منهم لا تعدوا مجرد تذكرة و تهذيب للقلوب و ليس لتعلم احكام الدين او اخذ الفتاوى و لا يحق لهم مهما كانوا ان يتصدروا للفتوى بأى وجه الا بعد اخذ الاجازة المؤهلة لذلك و هذا ينطبق على باقى فروع الدين
احب اقول ان الفضل بعد الله سبحانه و تعالى فى موضوع التزامى الدينى و رجوعى هو عمرو خالد مش معنى انه بيغلط يبقى ابخسه حقه
قال رسول الله صلى الله عليه و سلم
لأن يهدي الله رجلا بك ، خير لك من أن يكون لك حمر النعم
حديث صحيح فى صحيح الجامع برقم 3009
سؤال للمتشددين الرجعيين المتزمتين امثالى لان انا زيهم
هل تابعتم حلقاته و سمعتم سلاسله و فندتم اقواله؟ ام انكم تنقلون اخبارا عن غيركم؟ ام انكم انتقدتم افعال رأيتموها مصادفة و لم تتابعوها؟
سؤال اخر
هل ترون انه رجل سوء للدرجة التى ليس له اى حجة او حتى مجهود يشكر عليه؟

الثلاثاء، مايو 01، 2007

أتقتلون رجلا ان يقول ربى الله

من زمن ليس بالقصير و ايضا ليس بالطويل ظهر على شاشات التلفيزيون المحلى
جذبنى اسلوبه و شدتنى طريقته البسيطة فى سرد المواضيع
لا انكر اننى استفدت منه و من برامجه و شرائطه
تعلمت منه ثم بعد ذلك اثرت ان اتعلم المزيد
لم اعد اتابعه كما سبق و لكن من حين لاخر حتى بعد خروجه من مصر
تذكرت كيف بدأ و كيف سمعت له
تذكرت سلسلة العبادات و سلسلة الاخلاق و سلسلة اصلاح القلوب اول السلاسل له و اول ما سمعت و تأثرت به
بعد ذلك شاهدت له حلقات و نلقى الاحبة و كانت رائعة حقا و من خلالها تتعرف على صحابة الرسول صلى الله عليه و سلم
و منذ بدأ عمرو خالد قوبل بهجوم شديد من فئات شتى
من السياسيين و من المتدينين انفسهم
حجة المتدينين (و كم اكره هذه الكلمة نظرا لاحتوائها على معنى ضمنى بأنهم فئة خرجت عن العرف) حجتهم انه رجل حليق
و قالوا عنه انه كثيرا ما يخطئ فى الاحداث و فى رواية الاحاديث
قالوا عنه انه شيخ كاجوال
اخذوا عليه عمله لجلساته فى النوادى
اخذوا عليه وجود نساء كثيرات غير محجبات
و و و
انا لا انكر ان بعض هذه المآخذ صحيحة مثل بعض اخطائه فى رواية الاحاديث و انه لم يتحقق من صحة هذه الاحاديث او تلك
لا انكر خطأ المعدين لادخالهم الموسيقى فى بداية و نهاية برامجه
و لكن هل هذه ذريعة لمهاجمته؟ للمطالبة بتوقفه؟ و تخليه عن مسلكه؟
كل الناس يخطئون
شيوخا اجلاء يخطئون
علماء افذاذ يخطئون
فهل نمسك لهم السيف؟
نقول عليهم انه اذا اجتهد العالم فأصاب فله أجرين و اذا أخطأ فله أجر
و هذا من كلام رسول الله صلى الله عليه و سلم
يعنى فى الحالتين مأجور فلا يحق لنا ان ننصب المشانق
ثم من نحن لنتصدى لهجومهم؟
هؤلاء العلماء يخطئون فما بالك بمن دونهم؟
هذا الرجل كان السبب الذى جعله الله لهداية اناس كثيرون
قال رسول الله صلى الله عليه و سلم
لأن يهدي الله رجلا بك ، خير لك من أن يكون لك حمر النعم
حديث صحيح فى صحيح الجامع برقم 3009
اخى العزيز
قبل ان تهاجمه او حتى تعدد مساوئه اطالبك بمزيد من الدقة
اطالبك بسماعه و الحكم عليه من خلال كلامه و ليس كلام الاخرين
اخى الحبيب لا اريدك امعة تردد كلام الاخرين دون تحقق
يقول الله تعالى
يأيها الذين ءامنوا إن جاءكم فاسق بنباء فتبينوا أن تصيبوا قوما بجهالة فتصبحوا على ما فعلتم نادمين
اية 6 سورة الحجر
اخى الحبيب لا اريدك ان تكون معول من معاول هدم و احباط لكل من اراد خيرا
لم نطلع على ما فى قلبه لنعلم نيته و عقيدته
لم تقتلون رجلا ان يقول ربى الله

الاثنين، أبريل 30، 2007

مبروك



يللا حالا بالا بالا هنوا المنشورين

بيان

بنقول الف خمسمية تلاتة و سبعين مبروك للسيد نوهيل خزعبلات و السيدة انسانة الانسانة لنشر موضوعين لهما فى جريدة المصرى اليوم اليوم الاثنين الموافق 30 ابريل سنة الفين و سبعة ميلاديا صفحة اربعتاشر ركن سمول بلوجرز
و بنقولهم لازم تيجوا و تجيبوا الحلاوة سندوتش بسطرمة و ازازة كوكاكولا و ان ما جابوش هاسلط عليهم جمهور المدونين الغفير و اعزمهم على حسابهم

انتهى البيان
ملحوظة
انا سالف التورتة دى ماحدش يقرب منها لو تكرمتوا

***

كنت عايز اكتب النهاردة حاجة غايظانى و افش غلى لكن بهذه المناسبة نؤجل الغيظ ليوم تانى
لكن احب ان انوه الى انه تم اضافة موضوع جديد فى مدونة تعليم اسمه المدونات من النوع القديم
و الموضوع يتكلم عن كيفية اضافة الاكواد للمدونات من النوع الكلاسيك بيتا و التى يظهر بها
Template
بدلا من
Layout
ادخلوا على بركة الله و برضه ما تقربوش من التورتة

السبت، أبريل 28، 2007

اهديها الى اخوانى فى العراق و الى اهل السنة فى كل مكان نصرهم الله
ملحوظة
هذه القصيدة ليست من تأليفى و لكنى احفظها من زمن و لا اعرف كاتبها
مسلمة من أرض المشرق تستصرخ واإسلاماه
من أفغانستان تناشد وتنادي وامعتصماه
واإسلاماه واإسلاماه واإسلاماه
عن أرضي قلعوني ... في الخيمة زرعوني
عن أهلي ضردوني ... عن أمي فطموني
واإسلاماه واإسلاماه واإسلاماه
قتلوا أمي قبل أبي ... وأخي أحمد قد قتلوه والشيخ يعانق تسعين ... ذبح الشاة قد ذبحوه
هدموا البيت حرقوا البيدر ... قتلوا الأصغر قبل الأكبر
واإسلاماه واإسلاماه واإسلاماه
جرحي ينزف عيني تدمع ... لكني أبداً لن أركع
وسأزرع في الخيمة وردة ... لأشم المسك بلا ألم
وأهز بيمناي المهد ... يأوي فيه ابن المعتصم
وبكل الأمل أناديه ... وامعتصماه وامعتصماه
فيرد عليّ يلبيني ... واإسلاماه واإسلاماه واإسلاماه

الاثنين، أبريل 23، 2007

مافيش عريان فى اليابان يا ....جدعان

السلام عليكم
فى الاول احب ان اشكر كل اللى سأل عنى فى غيابى و خصوصا الاعزاء الثلاثة
اسامة كلام لوجيك
امانى بنت الجنوب
العزيزة نسرين
و كان سبب الغياب حماقة جديدة من حماقات الكمبيوتر الشخصى و فى محاولة لانعاشه اخذت و قتا كثيرا و كذلك محاولة التخلص من سيطرة مايكروسوفت و هيمنتها على انها القطب الاواحد فى عالم انظمة التشغيل و المسيطر على اكبر حصة فى السوق العالمى
و محاولة التخلص من هذه الهيمنة المزعجة حاولت النقل الى نظام ابل ماك او حتى لينوكس و لكن .....!!!! معلش هاييجى يوم و اهى المحاولات مستمرة بس البوست ده بيتكتب على نظام اكس بى اللعين
نرجع بقى لبوست النهاردة و اللى بيتبنى على بوست عريان فى اليابان
***
صديقى العزيز عصام من اليابان زعلان
زعلان من التعليقات اللى اتكتبت عن اليابانيين و لغة الجابان
التعليقات اللى اتريقوا فيها عليهم و هاقلكوا الحكاية و كان ياما كان
قاللى انه عجبه قوى تعليق كلام لوجيك اللى هو صاحبه اسامة و اللى باين من تعليقاته على انه شخص بعيد الرؤية او كما قال فى الرسالة
I like the commet of "KALAM LOGIC" which is seem a deep thinking person
و بعتلى بعض النقاط و طلب نشرها و هى لا تخرج عن كلام اخى الكريم اسامة
اولا
كما اخبرتك سابقا ان لغة اليابان صعبة كتابة و قراءة و لكنها سهلة للتحدث
ثانيا
بالرغم من صعوبة اللغة الا ان اصحابها جعلوها سهلة للغاية و انهم لا يرون اى صعوبة فى التعامل معها
كل شئ هناك باليابانية
و يوما ما سأل صديقى عصام احد اليابانيين لماذا لا تتعلم الانجليزية؟
رد عليه اليابانى و قاله لماذا اتعلمها و انا استطيع عمل اى شئ اريده باليابانية؟
ثالثا
طلب منهم مديره الشخصى تعلم اللغة و ذات يوم اراد توضيح احد الاشياء لاحد الزملاء باليابانية و لكنه لم يفلح و اذا به يكتشف ان زميله هذا يجيد الانجليزية بطلاقة و لكنه لا يستخدمها الا اذا فشلت الطرق الاخرى
رابعا
دخلت زوجته احد المستشفيات للولادة و اذا به يجد قاموس يابانى عربى فى الغرفة لمساعدته على سرعة التعبير فى مثل هذه المواقف الصعبة و التى لا تسعفه الانجليزية احيانا
خامسا
اليابانيين طيبين للغاية
فى احد الايام اكتشف صديقه عطل باحد اطارات السيارة فذهب للمكتب لاحضار الادوات اللازمة و اذا به باحد الاشخاص يقف بجانب السيارة و معه الادوات المطلوبة و بدأ بالفعل فى تغيير الاطار
سادسا
معلش الرسالة طويلة و انا ضد المواضيع الطويلة حتى لو كنت انا اللى كاتبها لكن ان شاء الله اعملها بوست خاص

الأربعاء، أبريل 18، 2007

حافظ الفاتحة؟

مستغربين من العنوان؟
هو فيه حد مش حافظ الفاتحة؟
ايوة و الكتير كمان و الرد ع السؤال ده فى اخر الموضوع
الظاهر ان انا هابقى مدرس لغة عربية
عجبتنى الفكرة خلاص
فى الموضوعين اللى فاتوا اتكلمت عن اللغات و لغة اليابان
ممكن تتابع هنا عريان فى اليابان و لغة الضاد
و فى الحقيقة ان دى مش اول مرة اتكلم ع اللغات لانه سبق و اتكلمت على اللغات فى موضوعين قبل كده
الرجاء المتابعة هنا هاللو ذير و كيا حال هى؟
اتكلمت فى الموضوع السابق عن نطق الاوروبيين و الاسيويين ( الاجانب الغير عرب عموما ) لبعض الحروف على غير اصلها زى حرف ال ص ينطق سين و حرف ال ض ينطق د و هكذا
لكن فى الحقيقة ان اللى بينطق الحروف دى غلط هم العرب نفسهم الا القليل ممن رحم ربى
ازاى؟
هاقولك
تعالى ننطق كلمة ( الكدب ) هانقول ايه
الراجل ده " بيجدب " !! صح؟ مش هو ده نطقها اللى اتعودنا عليه؟
طيب ( استغفر الله العظيم ) هاتنطقها ازاى؟
استخفر!! صح؟
بقت جاية من الاستخفار اى الاستعباد و العياذ بالله مش طلب المغفرة من الله اللى هى العبودية يعنى انت بتطلب عبودية الله ليك مش عبوديتك لله
شفت الكلام اتغير ازاى؟
-----
طيب انطق كلمة ثابت
هاتقول سابت صح؟ ليه؟ لانك ما طلعتش لسانك عند نطق الحرف ث
بقت جاية من السيبان مش من الثبات يعنى عكسها تماما
يعنى لو قرينا الاية
يثبت الله الذين امنوا بالقول الثابت فى الحياة الدنيا وفى الاخرة
اية 27 سورة ابراهيم
لو قريناها بالسين يبقى ايه؟
يسبت؟ يعنى جاية من السبت اى الراحة و السكون
ايه ده ؟ ده احنا غيرنا فى معنى القران بالشكل ده؟
ايوة
عارف لو انت قريت الفاتحة غلط هايحصل ايه؟
هاتتعرض صلاتك للبطلان
ده مش كلامى ده كلام اهل الاختصاص
و قلت هاتتعرض لانك ممكن ماتتحاسبش على جهلك فى بعض الاحيان لكن دلوقت عرفت!!! يعنى لو ما صلحتش الغلط هايعد عليك العداد يا حلو
و موضوع الفاتحة ليه جلسة خاصة ابقى تابعنى
هاه حافظ الفاتحة بقى؟

الاثنين، أبريل 16، 2007

لغة الضاد

اليابان
مستغربين من اللى قلته فى البوست اللى فات و ان اليابانى بالرغم من اصراره على العمل و جديته ممكن ما يكونش عارف يقرا لغته؟
قلتوا الحمد لله ان احنا من اهل اللغة العربية؟
لغة الضاد؟
طب حد فيكوا سأل نفسه او سأل اللى جنبه او اللى وراه عن معنى الجملة دى؟ لغة الضاد؟
انا اقلكوا
فى ايام الفتوحات الاسلامية بعد وفات الرسول صلى الله عليه وسلم و فى عهد ابى بكر الصديق رضى الله عنه و بعده لما انتشرت الفتوحات فى عهد الخلفاء الراشدين من سيدنا عمر الى سيدنا على و بعديه الحسن ثم سيدنا معاوية رضى الله عنهم و فى عهد الدولة الاموية و بعديها العباسية و افتتاح الدول الاسيوية مثل بلاد فارس ( ايران حاليا ) و بلاد ما وراء النهرين مثل اذربيجان و افغانستان و بعديها الهند و دول اسيا مثل بخارى و سمرقند و بلاد الترك و غيرهم و دخول اهل البلاد دى فى الاسلام ابتدوا يتعاملوا بلغاتهم لكن بيكتبوها بالحروف العربية مثل اللغة الاردية و الفارسية و البشتو و التركية و الكردية و غيرها
لكن ماننساش ان الناس دول اجانب يعنى لسانهم غير لساننا
زى معظم الاوروبيين ما يعرفوش حروف ال خ و ح و غ و ق و ص وض و ط
يعنى حرف ال ص مثلا ينطق
s
و طريقة نطقها بال س
و كذلك ض تنطق
d
و بلسانهم بتخرج د
اما الاسيويون فعندهم الحروف دى لكن فى نطقها بينطقوها زى الاوروبيين و الامريكان
لكن حرف واحد بس هو اللى بينطقوه حتى على غير شكله
ايوة هو حرف الضاد
بينطقوه ظ
و اسمه ظاد عندهم
يعنى الهنود و التراكوة و الافغان و الباكستانيين ( اصلهم هنود ) و غيرهم كتير من شعوب ما نعرفش عنهم حاجة و اللى بيكتبوا لغاتهم بالحروف العربية ( و بالمناسبة فيه كلمات عربية كتير فى لغاتهم ) ما يعرفوش ينطقوا حرف الضاد و هو الحرف اللى بيميز لغتنا الجميلة لغة القرآن عن اى لغات اخرى فى العالم
لغتنا هى اللغة الوحيدة على مستوى العالم اللى فيها حرف الضاد و اللى بيميزها عن غيرها من اللغات
عرفتوا بقى التراكوة او الترك كانوا لما بيقولوا حضرتنا بينطقوها حظرتنا ليه؟

الأحد، أبريل 15، 2007

عريان فى اليابان

ارسل لى صديقى العزيز عصام رسالة من اليابان
كلمنى فيها عن اليابان و لغة اليابان
كلمنى عن اللغة و مواقف طريفة حصلتله بسببها
قال لى مرة جاله جواب من شركة الكهرباء
طبعا باليابانى
اعطاه لزميل له فى العمل ليقراه له
زميله ما عرفش يقراه و طلع القاموس علشان يترجم
زميله ده يابانى من ام و اب يابانيين
يابانى اصلى اصلى اصلى
و اللغة اليابانية تتكون من ثلاث مجموعات من الحروف
هيراجانا و هى 48 حرف
كاتاكانا و هى 48 حرف
كانجى و هى حوالى 6000 حرف بيستخدموا منهم 2000 بس
و كانجى دى اصعب جزء فى اللغة و كل حرف فيها ليه ثلاث معانى مختلفة وده بيفسر ليه اخينا طلع القاموس
من الصعب جدا تلاقى يابانى ماسك جرنال فى المواصلات زى ما بيحصل عندنا لان اليابانى علشان يقرا لغته لازم يكون خريج جامعة
***
قالى ان لو شفت مرة واحد من غير هدوم فى المواصلات فى اليابان ما تستغربش
اكيد اكيد كان بيسأل عن الحمام فشاوروله على الاتوبيس
اليابانيين ما بيعرفوش يفرقوا فى النطق ما بين ث و ص او بالاصح فى اللغة الانجليزية ما بين
th
و
s
يعنى لو سألت واحد يابانى عن الحمام
bath
هايفتكرها اوتوبيس
bus
او حتى لو اتكلم هو و سألك اكيد هاتقوله الاتوبيس جوه فى الفندق
و اليابانى بينطق حرف السى فى اللغة الانجليزية شى
يعنى يقرا ايه بى شى
ما حدش عرف ايه اللى حشلى بقى؟

الجمعة، أبريل 13، 2007

الراكب

السلام عليكم
احب ان اشكر كل اللى علقوا على البوست اللى فات و اللى انا بأعتز بكلامهم جدا و ما احلى هذه المعرفة
معذرة لعدم استطاعتى الرد على التعليقات لكل احد بأسمه و لكن اقول امين على ادعيتكم
***
البوست ده مش هياخد كتير همه بس كلمتين
حدوتة من كلمتين
كان فيه احد الركاب بقاله 30 سنة راكب و دلوقت بيسأل امتى هاينزل؟
الراكب ده
حضرة مخى المحترم

الخميس، أبريل 12، 2007

الهى

اللهم إني أشكوا اليك ضعف قوتي وقلة حيلتي وهواني على الناس، يا أرحم الراحمين
أنت رب المستضعفين وأنت ربي
إلى من تكلني؟ إلى بعيد يتجهمني، أم إلى عدو ملكته أمري؟
*
*
*
إن لم يكن بك غضب على فلا أبالي
*
*
*
إن لم يكن بك غضب على فلا أبالي
*
*
*
إن لم يكن بك غضب على فلا أبالي
*
*
*
ولكن عافيتك هي أوسع لي
أعوذ بنور وجهك الذي أشرقت له الظلمات وصلح عليه أمر الدنيا والآخرة
من أن تنزل بي غضبك، أو يحل علي سخطك
*
*
*
لك العتبى حتى ترضى
*
*
*
لك العتبى حتى ترضى
*
*
*
لك العتبى حتى ترضى
ولا حول ولا قوة إلا بك

الأربعاء، أبريل 11، 2007

باحبك يا مصر

لما تيجى امريكا تتلكك باللى بيحصل عندنا و تتدخل فى امورنا الشخصية
اقولها لأ مالكيش دعوة
نار اخويا احسن من نارك بكتير
تعالى يا مصرى اشتمنى عذبنى اسجنى هد البيت فوق دماغى و لا تسمحش لامريكا تدخل عندنا
ساعتها بأقولها انا بحب مصر كده زى ما هى
يا اللى بتقرا الكلام ده دلوقت اسمعنى
انا باحب مصر
انتى يا ست ياللى بتنشرى الغسيل سيبك من الغسيل ده و اسمعينى
انا باحب مصر
انت ياد منك له سيبكوا من الكورة و اسمعونى
انا باحب مصر
يا عم الحج انت يا اللى ماشى على مهلك اقف و اسمعنى
انا بحب مصر
يا سواق التاكسى انت نزل الزبون ده و خليك معايا
انا باحب مصر
انت يا بت ياللى بتسرحى شعرك قدام المراية قولى ورايا
انا باحب مصر
انا باحب مصر يا اخواننااااااااااااااااااااااااااااااااااااااااااااااااااا

الثلاثاء، أبريل 10، 2007

الظاهر انى جالى برد فى نافوخى
و الا جالى روح معنوية و الا ايه مش عارف بالظبط
حاسس ان عندى حمى مزمنة فى نفسيتى
مش عارف اوصفها ازاى
بس ممكن نقول عليها استبحس و الا تبلور فى الغدد الليفاوية من الليف يعنى
و الا روحى عايزة تعطس و بما انه مش من صفاتها فعاملالى ازمة
و حاسس كمان ان روحى اتحولت لقطة بتتنطط فى نافوخى و تخبط فى السقف علشان تكسره
بتهيألى كده ان الدم ده عبارة عن كمية كائنات بتجرى ورا بعض علشان يتخانقوا عاملة زى ما الكلب بيجرى ورا ديله عاوز يعضه
انا نفسى ابقى انسان جاهل و عندى حتة ارض بازرعها علشان نافوخى يستريح
كل ما افهم حاجة باتعب اكتر
سؤال ع الماشى
ايه احساس واحد مجنون عايش فى السراية الصفرا؟

الجمعة، أبريل 06، 2007

ايها المدون ارجوك اسمعنى

تكملة التاج التأليفى بتاعى
انت ليه مابتكتبش بوستات طويلة؟
نادر قوى اكتب بوست طويل لان ده بيزهق القارئ و كمان انا بأزهق بسرعة من البوست الطويل فمن منطلق حب لاخيك ما تحب لنفسك بأكتب بوستات خفيفة الى حد ما
غير انها مش طالبة رغى ما هو كل الناس بترغى
الست اللى فى المترو بترغى
الحلاق بيرغى
الراجل اللى ماشى على مهله قدامى فى الشارع و معطلنى بيرغى
الست اللى بتنشر الغسيل بترغى
الرقاصة المتنكرة فى صورة مذيعة بترغى
هل لو طلب منك احد المدونين مقابلتك شخصيا ها توافق؟
لو فيه اى مساعدة اقدر اقدمهاله مش ها اتأخر لكن لمجرد المعرفة فأنا افضل انها تكون عبر المدونات لانها افضل من الواقع علشان ما يجيش اليوم اللى هافقد فيه صديق عرفته
هل انت راضى عن كتاباتك؟
لو ما كن ما كن
يعنى لو ماكنتش راضى ما كنتش كتبت
هل انت راضى عن مستوى انتشار مواضيعك؟
بصراحة لأ
لأن مواضيعى الجد ما انتشرتش زى المواضيع التهريج و ممكن تشوفوا كمية التعليقات على كل موضوع و هاتعرفوا
تفتكر ايه السبب؟
اكترية القراء بيحبوا التهريج
طب و الحل؟
الحل ان اتكلم بالهجايص
ايها المدون هأكلمك بالكلام اللى بتحبه
ابوك هايسيب البيت يا صولطان
البيت هايتهد فوق دماغ اهالينا يا ابو الصلاطين
فووووووووووووووووووووووووووووووت
هعهعهع
و الا تحب اكلمك بكلام المعلمين؟
المدونة
و زوارها
اللى على دماغنا من فوق
المدونين
المدونين اللى بيحبونا
اللى ما بيحبوناش لأ
اللى بيسيبوا تعليقات
اللى مابيسيبوش لأ
و رقصنى يا جدع
تررام تام ترا رام ترا رام

انا جاى اكمل التاج اللى فات على مزاجى
يعنى ها ألف تاج من عندى
السؤال الاولانى
ايه طبيعة كتابتك فى المدونة؟
مع ان السؤال ده مكرر يعنى اتقال فى التاج اللى فات لكن حبيت اقوله لان انا عايز اجاوب عليه من زاوية تانية
زى ما قلت قبل كده ان كتاباتى فى المدونة ما هى الا مذكراتى الشخصية و شوية نصايح لاصحابى المدونين
يعنى ما فيش اتجاه معين للمدونة
يعنى ممكن اتكلم فى اى حاجة حسب المود بتاعى
متغاظ من حاجة و ده بيحصل كتير اكتبها
فرحان من حاجة و ده ناااادرا ما بيحصل اكتبها
شوية نصايح واقفين فى سقف حلقى ااااجى ادوشكم بيهم
لكن المنظر العام بتاع مدونتك و اللينكات اللى فى السايد بار بيقول ان اتجاهاتك دينية؟
اولا احب اقول ان الدين ما ينفعش اقارنه بأى حاجة تانية يعنى فيه ناس اتجاههم سياسى و فيه ناس تانية اتجاههم فكاهى و ناس تالتة اتجاههم ادبى
لكن ما ينفعش اقول ان اتجاهى دينى لان بكده انا حطيته بمقارنة مواضيع تانية و كمان نفيت الدين عن كل ما اتجه اتجاه مخالف
ثانيا ما يمنعش ان كنت باحب دينى و معتز بيه و اتكلم فى مواضيع مش مرتبطة بيه
يعنى مثلا لما اقابل واحد صاحبى فى الشارع اقوله خطبة دينية؟
مش ممكن اتكلم معاه على احواله و احوالى و زعلى و فرحى؟
المدونة برضه كدة
باتقابل معاكوا فيها و اتكلم على همومى و افراحى
هل تسعى لارضاء السادة المدونين بكتاباتك؟
ما ينفعش ارضى كل الناس و حتى لو حاولت هاخسرهم كلهم
لكن زى ما قلت قبل كده انا باتكلم عن مشاكلى انا و عن همومى انا و نصايحى انا اللى باقولها هنا
ممكن فيه ناس بتعجبهم كتاباتى
و فيه ناس بتختلف معايا
بس مش معنى كده احاول ارضيهم علشان اكسب زبون
لما انت بتحب دينك ليه ما بتكتبش فى الدين؟
كل الناس بتتكلم فى الدين
كلهم بقوا يفهموا فيه و يفتوا فيه و يناقشوا بعض فيه
علوم الدين موجودة فى الكتب و الشرايط و السيديهات و فى كل حتة
يبقى لو اتكلمت مش هاضيف جديد
و كمان اللى بيتكلم فى الدين لازم يكون مؤهل للكلام فيه
يعنى لما اتكلم فى شرح اية مثلا يبقى لازم اتعلم تفسير و اعرف الاقوال المتعددة فى تفسيرها غير ادراكى لعلوم تانية مرتبطة بيها زى الناسخ و المنسوخ و اكون حافظ احاديث كتيرة صحيحة بتشرح الاية دى ناهيك عن شرح القران بالقران يعنى اكون حافظ ايات كتير بتفيد فى شرحها
و لما اتكلم فى الفقه يبقى لازم اكون دارس قران و علوم حديث و اعرف اقوال العلماء و الادلة و الفرق ين المذاهب و القواعد الفقهية و علوم تانية كتير ضرورية
يتبع

الخميس، أبريل 05، 2007

تاج تانى

التاج ده من اهداء عاشقة الوطن صاحبة الطآآن
و انا بانتهز الفرصة للتيجان دى علشان اتكلم معاكوا شوية و اعرفكوا على نفسى اكتر
اسم مدونتى مكتوب فوق و اخترته لانه بيمثل كل حاجة ممكن اقولها يعنى فى كل المجالات لان الحواديت مالهاش مجال معين
و مافكرتش اقفلها لانى لسة فاتحها و ما حصلش حاجة تستدعى ده و ان شاء الله مش هايحصل ها يا باشمهندس؟
و الصورة اللى انا مختارها بترمز لنفسى يعنى نص واضح من كتابته و نص غامض برضه من كتابته و كمان مستخبى من افكارى
و انا بادون لانى عايز كده علشان اعبر عن نفسى لانى باعتبر التدوين مذكرات شخصية و نصايح باقدمها لاصدقائى الحلوين ايون..... انتم
احلى جملة قيلت فى وصف مدونتى هى التى لم تقال بعد هههههههههه
و تعليقات الناس مهمة عندى جدا حتى لو كانت مجاملة لكن الاحلى انها تكون فيها توضيح او نصيحة
و احلى مدونة قريتها هى كل مدونة سيبت فيها تعليق و احلى بوست هو برضه اللى سيبت التعليق و رغيت فيه شويتين
اما اسوأ مدونة و اسوأ بوست فهى كل ما هاجم الدين و الاسلام و كمان اللى مسميين نفسهم مثليين و مثليات لكن مش هاقول اسماء لان الاولى اننا ندعى ان ربنا يهديهم بدل الفضيحة
اما احلى بوست كتبته فهى البوستات اللى كتبتها عن المذاهب و الشيعة و هى
و اخيرا

الثلاثاء، أبريل 03، 2007

تاج

التاج ده من اهداء د.ماعلينا و رفقة عمر و ده تانى تاج بعد التاج الاولانى اللى كان من اهداء كلام لوجيك ساكاماكا نيوز سابقا و ريفندل تجربة فعالة سابقا و كان اسمه تاج تاج تاج
بس قبل ما اقول التاج احب اوضح ان ماعلينا دى مدونة الدكتورة البنت غير ما علينا الباشمهندس الراجل اللى اختفى فى ظروف غامضة
و قبل ما اقول التاج احب اوجهله كلمة
ارجع يا ماعلينا لاحسن افجر نفسى فى المدونة بتاعتك و اعوصلك المواضيع اشلاء و دماء
ارجع لاحسن اطخك عيارين
و قبل ما اقول التاج احب اعتذر عن التأخير فى كتابته مع العلم ان دى تانى مرة اكتبه لان المرة الاولى كتبته فى مدونة ماعلينا الدكتورة مش ماعلينا المهندس
و انا بانتهز الفرصة دى و اقوله انا زعلان بجد
و قبل ما اقول التاج احب
يا عم ارحمنا ابوس راسك يا اخى قول التاج
طب ماتزقش
احم احم
اححححححححححححححم
كح كح كح
السؤال الاول
هل كنت طالب شاطر فى المدرسة؟
طبعا اوفكورس
ده انا كنت من الاوائل و احب اضيف انى كنت باجيب درجات نهائية
بس مش فى كل السنين الحق يقال انا ماكنتش مهتم بالدراسة فى سنة ستة ابتدائى
اصل انا قديم شوية و اخدت ستة قبل ما يلغوها و يرجعوها تانى
و كنت بالعب كتير فيها لكن لما دخلت الاعدادية رجعت شاطر تانى
اما الثانوية فكنت حاجة تانية خالص
كنت شاطر برضه و دخلت كلية العلوم جامعة القهرة قصدى القاهرة
ايه كانت احب مادة ليك فى المدرسة و فى الكلية؟
اقولك سيبك من المدرسة لانى تقريبا كنت مخنوق منها حتى لغاية دلوقت بس كنت باحب الكيمياء العضوية و الفيزياء
اما الكلية كنت باحب برضه الكيمياء العضوية و الفيزياء و الجيولوجيا و الاقتصاد و باكره المحاسبة و اسرائيل
كنت عايز تطلع ايه و انت صغير؟
دوكتور و ظابط و مهندس و سواق طيارات
و دى كانت اخر طلعة جوية ليا

الأحد، أبريل 01، 2007

السبت، مارس 31، 2007

فكها يا اخى

اضحك
اضحك
اضحك اضحك اضحك
ليه تدايق و تزعل و تغضب
اضحك دايما و افرح و العب
اضحك اضحك اضحك
بابا
لو نسى مرة يدينى مصروفى اللى معودنى عليه
ما كانتش ظروفه مساعداه و ماعاهوش فكة اعمل ايه؟
ازعل؟
لا
ادايق؟
لا
اعمل ايه؟
نضحك
طبعا نضحك يللا نضحك
استاذى اللى فى المدرسة لما
يزعقلى و ينصحنى بكلمة
مستقبلى فيها و مصلحتى
متوقفة عليها دراستى
ازعل؟
لا
ادايق؟
لا
اعمل ايه؟
نضحك
طبعا نضحك يللا نضحك
ماما
لو ماما كانت مش رايقة
مشغولة عنى و متدايقة
مش قادرة منى تاخد بالها
و لا قادرة كمان تفضى لروحها
ازعل؟
لا
ادايق؟
لا
اعمل ايه؟
نضحك
طبعا نضحك يللا نضحك
لو صاحبى مرة غلط فيا
و نرفزنى و دايقنى شوية
تقلها و زودها عليا
و لو حتى نسى صحبته ليا
ازعل؟
لا
ادايق؟
لا
اعمل ايه؟
نضحك
طبعا نضحك يللا نضحك
اضحك
اضحك
اضحك اضحك اضحك
ليه تدايق و تزعل و تغضب
اضحك دايما و افرح و العب
اضحك اضحك اضحك

الخميس، مارس 29، 2007

يا بخت مين وفق

السلام عليكم
رجوع بعد غيبة
احب اولا ان اشكر العزيزة رفقة عمر و العزيزة امانى بنت الجنوب لاهتمامهم بالسؤال عنى
الحكاية ما كانش فيها حاجة كبيرة و الحمد لله
يعنى ما كانش فيها مصايب و فجائع تقصم الضهر بس كان فيه شوية اكتئاب و لسة ما راحوش لحالهم الحمد لله
مشاهد بترقص قدام عينى بخصوص التعديلات اياها و مشاركة الناس اللى مش فاهمه حاجة و عمرهم ما عرفوا يعنى ايه دستور
المشهد الاول
من مسرحية المتزوجون
حنفى بيسأل مزيكا
بتعرف فى السياسة يا واد يا مزيكا
ايوة يا سى حنفى ده انا الشعب
طب تعرف سياسة الوفاق
يا بخت مين وفق راسين فى الحلال
دى سياسة امك دى
المشهد الثانى
فى فيلم السادات
و اول مشهد بعد استلامه الحكم و داخلين عليه بالشرايط المسجلة لمكالمات الناس و امره بوقف عمليات التصنت و حرق الشرايط
احنا رجعنا لورا قبل المشهد ده
رجعنا لايام مراكز القوى و كله عامل فيها ريس و كله بيتحكم فى كله
المشهد الثالث
فى فيلم الكرنك
مدير السجن بيسأل المسؤول عن التسجيلات هل ممكن يطلع ادانة من التسجيلات دى و الا لأ؟
و كله بالفبركة

السبت، مارس 24، 2007

الشنقيطى و الوهابيون

كبرت كلمة تخرج من أفواههم إن يقولون إلا كذبا
آية 5 سورة الكهف
خرج الشيخ محمد الامين الشنقيطى رحمه الله من تنبه بموريتانيا مسقط رأسه حاجا الى بيت الله الحرام
كان قد طلب العلم فى بيته و بين اخواله الذين كفلوه بعد نشأته يتيما
وتولى القضاء في بلده فكان موضع ثقة حكامها ومحكوميها
سمع كثيرا عما يحدث فى ارض الحجاز
فى بلد الرسول صلى الله عليه و سلم
سمع عن اؤلئك الذين اتخذوا الدين ستارا ليصلوا الى اطماعهم فى السلطة و بدعهم فى الدين
انهم هؤلاء الوهابيون الذين طالما سمع عنهم و حذره كثيرون منهم
دخل الشيخ مكة حاجا
قرأ كثيرا من كتب الوهابيين و درس معتقداتهم
قرأ كتب امامهم الشيخ محمد بن عبد الوهاب الذين ينتسبون اليه
تعرف عليهم من خلال كتب امامهم مثل كتاب التوحيد و فضل الاسلام و نواقض الاسلام العشرة و غيرها كثير
عرف انهم يتخذون من مذهب الامام احمد بن حنبل منهجا
لم يكن فيهم ما وصفهم به الناس فى بلده
لم يرى منهم ما سمعه عنهم
انهم اناس رجعوا الى كتاب ربهم و سنة نبيهم فى زمن انتشرت فيه البدع و البعد عن دين الله
انهم اناس تصدوا لما يحاول الصوفيون من الاتراك نشره من فساد مذهبهم
عمل بقول الله تعالى
يأيها الذين ءامنوا إن جآءكم فاسق بنبإ فتبينوآ أن تصيبوا قوما بجهالة فتصبحوا على ما فعلتم نادمين
اية 6 سورة الحجرات
و ما أشد الندم بين يدى الله تعالى
يا من تطلقون السنتكم هل عرفتم القوم؟ هل علمتم الى ماذا يدعون؟ هل علمتموهم من خلال كتبهم؟
هل سلكتم ما سلكه محمد الشنقيطى رحمه الله؟
ام سيطر الجهل على اذهانكم و عميت ابصاركم و صمت اذانكم؟
ام تحملون على ظهوركم اسفار غيركم كمثل الحمار يحمل أسفارا؟
بدلا من ترديد شعاراتكم و ما لقنوه اياكم اعداء دينكم اقرأوا بأنفسكم ما كتبوه و الى ماذا يدعون اليه
هل تريدون ان تعملوا بكتاب ربكم؟ هل تريدون ان تتبينوا لكى لا تصيبوا قوما بجهالة ام تنطبق عليكم اية الكهف فتكبر كلمة تخرج من افواهكم؟
لقد اعتاد اعداء الدين القدح فيه بكل الطرق
فسموهم بالوهابيين ليوهمونا بأنهم فرقة ضلت منهج ربها
لا و الله انهم مسلمون
اهل سنة
مسلمون لا وهابيون
لمعرفة ما هم من سموا بالوهابيين و معرفة حقيقتهم الرجاء الدخول الى هذا الموقع
و هذا كود لنشره و للرد على اعداء الدين الذين يريدون القدح فى اصحاب المنهج الصحيح



رحم الله بن عبد الوهاب

رحم الله ابن تيمية

رحم الله احمد بن حنبل

رحم الله اهل السنة

الجمعة، مارس 23، 2007

الحمد لله عندى دش

الدكاترة دول طلعوا مابيعرفوش حاجة
بقالهم سنين بيحاولوا مع امراض مزمنة و مش عارفين يعالجوها
دلوقت قنوات الدش بتعمل اعلانات عن ادوية لتصليح الامراض دى زى السكر و الكبد الوبائى و بتعمل اعلانات عن كريمات للصلع و للضعف الجنسى والتخسيس و شد الوجه و النتيجة فى خلال ايام
يا سلااااام كانوا فين من زمان
الحمد لله ان انا عندى دش

الخميس، مارس 22، 2007

تساؤلات

الشرطة و الشعب فى خدمة الوطن
يعنى ايه وطن؟
***
واحد بيقول
انا صحيح ما بصليش بس بينى و بين ربنا عمار
ازاى؟
***
الواد ده اخلاق و طيب
هو بس بيشرب سجاير و بتاع بنات و ما بيصليش
بس قلبه ابيض
اه قلبه ابيض
***
دكتور (طبيب يعنى ) عمل برنامج بيهاجم الناس بتوع الحجامة
بيستخدموا كاسات و مشارط مش معقمة
هو مين اللى بينسى الفوطة فى بطن المريض و اللى بيتسبب فى تسمم الجروح بعد العمليات؟
بتوع الحجامة؟
اذا كان بيتك من ازاز يا دوك
***
بيطالبوا دلوقتى بتغيير القانون علشان يتصدوا لبتوع الحجامة
كل ما يثيروا حاجة يقولوا نعدل القانون
لا تشددوا فيشدد الله عليكم
***
سمعت ان فيه مؤتمر لمحاربة التداوى بالاعشاب
ده علشان الدكاترة ياكلوا عيش و الا ايه؟
***
قوم يا مصرى مصر دايما بتناديك
ده ايام ماكان ليها صوت؟
***
كل برنامج فى التليفزيون و كل مذيع هايف يتكلم فى الدين
و يتصل بناس اهيف منه و يقعدوا يفتوا
كلام كلام كلام
هاو هاو هاو
جر امشى
***
تعديلات دستورية عندنا
يعنى ايه دستور؟
يعنى حاجة حلوة و الا حاجة وحشة
***

الاثنين، مارس 19، 2007

عم محمود

كنت جالسا ذات يوم فى حجرة مكتبى بالشركة التى اعمل بها و بينما انا مستغرق فى العمل اذا بى برجل تجاوز الستين من عمره يدخل على ليسأل عن اتجاه القبلة فاخبرته بها و دعيته للصلاة معى
و بعد الانتهاء من الصلاة تعرفت عليه
انه عم محمود جاء الى الشركة ليبحث عن عمل ليواجه به اعباء الحياة هو و زوجته العجوز و ابناءه الكبار الذين لم يجدوا عملا بعد
نظرت اليه و حمدت الله على نعمته على بان وجدت هذا العمل فى مثل سنى و هذا الرجل الذى يبلغ عمره ضعف عمرى مازال يبحث عن عمل
تذكرت حينها اقرانى و غيرى من الشباب العاطل و حمدت الله ثانية معترفا بفضله على
تسائلت حينها عن سر تمتع هذا الرجل العجوز بهذا القدر من الامل و سعيه وراءه حتى جاء الى مقر الشركة الذى يبعد عن المدينة باكثر من ساعة
تركت العمل لظروف مرت بى
جلست اتذكر ما مر بى من احداث
مرت فترة ليست بالقصيرة ابحث عن عمل
لكنى لم اكن بمثل حماس و امل هذا الرجل عم محمود
كان عقله شابا فى جسده العجوز
الان ارى عقلى قد تجاوز الستين بينما جسدى عمره الثلاثون

الأحد، مارس 18، 2007

قوالب قوالب

اعلان
تم عمل موضوع جديد فى مدونة تعليم عن القوالب او التيمبليت
Templates
لتغيير شكل المدونات
رابط الموضوع

السبت، مارس 17، 2007

انا لله و انا اليه راجعون

انتقل الى رحمة الله والد رفقة عمر
اخوانى امنوا على دعائى
اللهم ادخله جنتك
اللهم اعذه من نارك
اللهم افسح له فى قبره
اللهم اجعل قبره روضة من رياض الجنة
اللهم ابدله دارا خيرا من داره
و اهلا خيرا من اهله
اللهم اغفر له
اللهم ارحمه
اللهم ابدل سيئاته حسنات
اللهم ادخله الجنة بغير حساب و لا سابقة عذاب
اللهم اجره من نارك
اللهم اعذه من عذاب القبر
اللهم ارحم اموات المسلمين

الخميس، مارس 15، 2007

الأربعاء، مارس 14، 2007

احساس

حاسس ان اولمرت بيضحك فى سره لما بنتكلم عن هزيمة اسرائيل امام حزب الله الشيعى و بيقول شوف العرب الهبل بيحتفلوا بالنصر و هما مش عارفين ان احنا حققنا هدفنا و شردنا الملايين من المسلمين
حاسس ان اولمرت بيجز على سنانه و يحاول يقول لشعبه الحقيقة اللى فاتت
حاسس ان عباس كان جعان علشان كده راح اجتمع مع اولمرت و طبعا اعلن ان الاجتماع ما اسفرش على شئ علشان لما يحب ياكل تانى يبقى فيه حجة
حاسس ان المذيعين اللى بيطلعوا فى التليفزيون كانوا كلاب و ربنا سخطهم بنى ادمين يقعدوا يهوهوا فى وشنا
حاسس ان فيه دين جديد ظهر و الناس بيتجادلوا فيه
مش عارف مين الجاهل فينا انا و الا هما؟
حاسس ان الناس دى فاكرة دماغنا سلطانية بليلة بيعبوا فيها براحتهم

الثلاثاء، مارس 13، 2007

خوف

زمان كنا بنخاف من البلطجية و نستنجد بالشرطة
دلوقت بقينا نخاف من الشرطة اكتر من البلطجية
يا ترى بكرة هنخاف من مين؟

الأحد، مارس 11، 2007

فتة

بيتكلموا دلوقت عن تولية المرأة القضاء
و بيجيبوا فتاوى بتايد الكلام ده
قبل كده اتكلموا عن ختان الاناث
و برضوا جابوا فتاوى بتأيد الكلام ده
قصدى بتأيد كلامهم هما
بكرة صباع البيه يوجعه يقوموا يطلعوا فتة قصدى فتوى بتقول يجوز ان صباع سيادته يوجعوا
طب ممكن ادخل الحمام علشان مزنوق؟
فيه فتوى بتقول الكلام ده يا اخواننا؟

السبت، مارس 10، 2007

اميل

من كام يوم جالى اميل و اول حاجة لاحظتها انها مبعوتة من ييجى تلاتين تلاف واحد الى تلاتين تلاف واحد برضه
و عنوانها ارجو نشرها فى جميع المنتديات و دلوقت الاقى ناس بينشروها فى مدوناتهم و بيبعتوها لبعض علشان ياخدوا ثواب
الاميل بيقول ان جريدة اسبانية بتجرى استفتاء حول ماهي الشخصية الكبيرة التي لها تاثير على البشرية ومن تلك الشخصيات الحبيب المصطفى صلى الله عليه واله وسلم وباقي الانبياء كسيدنا عيسى وعدة شخصيات اخرى و ان الاعلى تصويتا سيجرى اعداد برنامج عنه
طيب دخلت الموقع بتاع جريدة الموندو الاقيه باللغة الاسبانية
كل حاجة فيه بالاسبانى
فتحت بقى ووقفت شوية لغاية مالمحت كلمة ماهوما
Mahoma
طيب
انا ما بعرفش اسبانى اوك
الاسم ده بتاع مين؟
غلطانين فى الاسم؟
و على فكرة ده واخد اعلى تصويتات 84% ارجو انه يكون فعلا هو الرسول صلى الله عليه و سلم
ايش درانى على انه فعلا اسمه؟ طب تعرفوا انتوا؟
قبل ما تصوتوا اتأكدتوا؟
طيب لو طلع صح مين اللى هايعمل البرنامج ده؟ و لمين؟
الاميل بيقول كى يتعرف عليه الاسبان و الاوروبيين
هيجيبوا المعلومات عنه من مين؟
و هيقولوا ايه عنه؟ طب هايسماحولنا نفتش عليهم؟ قصدى نبدى استياءنا لو لاقينا فيه حاجة غلط؟
نافوخى يا عالم

الخميس، مارس 08، 2007

دبل كليك

الواحد بقت حياته ماليانه غيظ
ماليانه حاجات كتير غايظاه
يتغاظ و يسكت و يفضل يسكت يسكت و تيجى حاجة هايفة تخليه ينفجر
انا بقى ليا واحد صاحبى كل ما يقعد ع الكمبيوتر و يدخل ع النت فى كل لينك يضغط عليه دبل كليك
اتجنن بابقى عايز امسك فى زمارة رقبته
بابقى عايز اصرخ
كليك واحدة حرام كليك واحدة مش اتنين
اللينكات كليك واحدة ارحمونى
قايمة ستارت باللى فيها كليك واحدة مش دبل كليك
ابوس راسكوا
خلاص هاطق
***
معلش سامحونى
بقالى كام يوم كده زهقان و ما عادش عندى صبر للقراية الطويلة
يعنى ما بأقدرش اقرا اى حاجة سواء كتب او بوستات طويلة و باتخنق على طول
فسامحونى ان قصرت مع اى حد و معلقتش عنده من فترة او حتى ما قريتش اى بوست عامله
عملت حاجة جديدة انى اقرا البوست على مراحل و ابتديت بس وقعت فى مشكلة تانية ان بعض المدونات و خصوصا اللى بحبها اصحابها عندهم غزارة فى الكتابات اللى بتوصل لبوست كل يوم ع الاقل زى حلاتى كده
يعنى عقبال لما اقرا بوست الاقى طلع بعديه اتنين تلاتة
فمعلش سامحونى
***
اعلان
مواضيع جديدة فى مدونة تعليم
اللينكات و كيفية وضعها فى التعليقات
كيف تصنع شريط الاخبار الخاص بك؟
شريط الاخبار
و غيرها كتير
و المدونة دى عملتلها اسوأ دعاية باننى قلت انها خاصة بالفوتوشوب و النتيجة انها مهجورة و جالى احباط و الحقيقة انها بتخدم موضوع صناعة المواقع و فيها اكواد و كيفية وضعها فى المدونات

الأربعاء، مارس 07، 2007

العمدة و الاراجوز

ياحضرة الاراجوز قول لي
نعم ياعمدة عاوز ايه
منين يروحوا المتولي
امدح نبينا وصلي عليه
اللهم صلي عليه
تمشي كده على طول على طول
ها
لحد ماتلاقي عمارة
لحد ما الجى عمارى
تدخل يمين تلقى بتاع فول دكانته على ناصيه حارة.
دكانته على ناصيه حارة
تدخل يمينك في شمالك.. شارعين وفي التالت تكسر..
على اليمين واخد بالك... وتمشي على طول تتمخطر.
وامشي على طول واتمخطر
تفضل كدا تمشي وتدب
وتخش من مطرح ما طلعت
ولما تلقى مقلة لب .
ولما الجى مجلة لب
تعرف انك تهت وضعت
دي وصفه هايله
هايلة قوى
دي وصفه سهلة
سهلة قوى
مع السلامه , مع السلامة , مع السلامة يا ابوعمة مايله
مع السلامة يا ابوعمه مايله
فتّح عينك تاكل ملبن
فينك فينك .. تاكل ملبن
فتّح عينك تاكل ملبن
فينك فينك .. تاكل ملبن
أوعى لجيبك لا العيب عيبك
قرّب .. جرّب .. نشّن
وسطن ايدك .. وسطن
أضرب
يحميك يا ابني تبقى غالبني قرّب خدلك حتة ملبن
قرّب خدلك حتة ملبن
قرّب خدلك حتة ملبن
فوررريرة للعيل
يا ابو العيال ميّل
خدلك سبع فرارير
زمّارة شخليلة
عصفورة يا حليلة
طراطير يا واد طراطير
طراطير طراطير طراطير
طراطير طراطير طراطير
و المفاجأة الليلة الكبيرة بالصوت و الصورة

الليلة الكبيرة يا عمى

بناءا على طلب رفقة عمر قلت اجيب الليلة الكبيرة لصلاح جاهين و هى تصوير لمولد الحسين
بس القصيدة كبيرة جدا لذلك انا هاحط جزء منها و ان عجبتكم اجيب الباقى
القصيدة
احم
احححححم
ياليييييييييييييييييييييييييييييييييل
اااقصد
***
قبة سيدنا الولي دول نوروها .
ما احلى البيارق والناس بيزوروها .
قبة سيدنا الولي في الجو عالية.
ما احلى البيارق لما نوروها.
حمص حمص حمووووص
حمص حمص , تل ما ينجص , عالنار يرجص
يرجص يرجص ويجوووول .
اللي شااااف حمص ولا كلش
حب وتلوع ولا ولا طالش
هئ هئ هئ
يسترك هات حبه بقرش.
ها هاهاهاها هاااااااااااااااااااااى
هاء هاء هاء هااااااااااااااااااااااااااااء
حمص حمص حمص حمووووووووص
الله الله الله
طعمية
اللوووووووووز
الله ... الله... الله
عجمية
اراجووووووووووووز
الليلة الكبيرة ياعمي والعالم كتيرة
ماليين الشوادر يابا م الريف والبنادر
دو فلاحين ودول صعايدة
دول من الكانال ودول رشايدة
الليلة الكبيرة ياعمي والعالم كتيرة
ماليين الشوادر يابا م الريف و البناادر
انتظرونا فى الحلقة القادمة مع الحوار بين العمدة و حضرة الاراجوز

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro