ترجمة مواقع الإنترنت

الثلاثاء، مايو 01، 2007

أتقتلون رجلا ان يقول ربى الله

من زمن ليس بالقصير و ايضا ليس بالطويل ظهر على شاشات التلفيزيون المحلى
جذبنى اسلوبه و شدتنى طريقته البسيطة فى سرد المواضيع
لا انكر اننى استفدت منه و من برامجه و شرائطه
تعلمت منه ثم بعد ذلك اثرت ان اتعلم المزيد
لم اعد اتابعه كما سبق و لكن من حين لاخر حتى بعد خروجه من مصر
تذكرت كيف بدأ و كيف سمعت له
تذكرت سلسلة العبادات و سلسلة الاخلاق و سلسلة اصلاح القلوب اول السلاسل له و اول ما سمعت و تأثرت به
بعد ذلك شاهدت له حلقات و نلقى الاحبة و كانت رائعة حقا و من خلالها تتعرف على صحابة الرسول صلى الله عليه و سلم
و منذ بدأ عمرو خالد قوبل بهجوم شديد من فئات شتى
من السياسيين و من المتدينين انفسهم
حجة المتدينين (و كم اكره هذه الكلمة نظرا لاحتوائها على معنى ضمنى بأنهم فئة خرجت عن العرف) حجتهم انه رجل حليق
و قالوا عنه انه كثيرا ما يخطئ فى الاحداث و فى رواية الاحاديث
قالوا عنه انه شيخ كاجوال
اخذوا عليه عمله لجلساته فى النوادى
اخذوا عليه وجود نساء كثيرات غير محجبات
و و و
انا لا انكر ان بعض هذه المآخذ صحيحة مثل بعض اخطائه فى رواية الاحاديث و انه لم يتحقق من صحة هذه الاحاديث او تلك
لا انكر خطأ المعدين لادخالهم الموسيقى فى بداية و نهاية برامجه
و لكن هل هذه ذريعة لمهاجمته؟ للمطالبة بتوقفه؟ و تخليه عن مسلكه؟
كل الناس يخطئون
شيوخا اجلاء يخطئون
علماء افذاذ يخطئون
فهل نمسك لهم السيف؟
نقول عليهم انه اذا اجتهد العالم فأصاب فله أجرين و اذا أخطأ فله أجر
و هذا من كلام رسول الله صلى الله عليه و سلم
يعنى فى الحالتين مأجور فلا يحق لنا ان ننصب المشانق
ثم من نحن لنتصدى لهجومهم؟
هؤلاء العلماء يخطئون فما بالك بمن دونهم؟
هذا الرجل كان السبب الذى جعله الله لهداية اناس كثيرون
قال رسول الله صلى الله عليه و سلم
لأن يهدي الله رجلا بك ، خير لك من أن يكون لك حمر النعم
حديث صحيح فى صحيح الجامع برقم 3009
اخى العزيز
قبل ان تهاجمه او حتى تعدد مساوئه اطالبك بمزيد من الدقة
اطالبك بسماعه و الحكم عليه من خلال كلامه و ليس كلام الاخرين
اخى الحبيب لا اريدك امعة تردد كلام الاخرين دون تحقق
يقول الله تعالى
يأيها الذين ءامنوا إن جاءكم فاسق بنباء فتبينوا أن تصيبوا قوما بجهالة فتصبحوا على ما فعلتم نادمين
اية 6 سورة الحجر
اخى الحبيب لا اريدك ان تكون معول من معاول هدم و احباط لكل من اراد خيرا
لم نطلع على ما فى قلبه لنعلم نيته و عقيدته
لم تقتلون رجلا ان يقول ربى الله

هناك 23 تعليقًا:

غير معرف يقول...

عجبتني موضوعيتك في الكلام عن عمرو خالد يا أخ خالد

لأني أنا كمان رغم إني كنت سلفي و متشدد لمن كنت في إعدادي و كنت بأسمعله برنامج و نلقى الأحبة على قناة إقرأ ، كنت بحس إنه بيخاطب نفسية الإنسان و قلبه و عقله مش مجرد تنصيب للأحكام و معرفة كلمتين نتشدق بيهم عن الإسلام

الإسلام دعوة

تحياتي و يشرفني أكون أول تعليق عندك

عصفور المدينة يقول...

حبيبي خالد انت فاتح موضوع شائك جدا أنا ألخص لك رأيي في الموضوع وانت عارف إني سلفي ومتشدد ومتعصب
:)
ما علينا على رأي بعضهم
مبدئيا هو داعية وله ناس يستفيدون منه
لا يعجبني كداعية وكل شخص له أسلوب يناسبه
غير دقيق وغير مدقق
يركن إلى الذين ظلموا بشكل أو بآخر بدليل أنه لم ينزل به أي ضرر حتى الان
لا أحذر اي أحد منه طالما هذا الشخص يستفيد منه وهذه أول مرة أتكلم عنه بشكل علني
طريقته وهذه الطريقة في الدعوة عامة لها سلبية أساسية وهي رؤية كل شخص لنفسه من خلال قناعات يتم بثها دائما إنك ملتزم مهما عملت طالما انك تحسن صياغة بعض الأفكار المتكررة مثل إنك تحب الله أكثر من اي شيء وتحب الصحابة وتحب وتحب
بدون ان يظهر ذلك واقعا على تصرفاتك
نريد المزيد من التشدد :(
بمعنى أن يعرف كل منا ما هو الالتزام الحقيقي الكامل حتى لو لم يلتزم به على أن يكون له هدف أسمى أن يصل إلى هذا الالتزام الكامل يوما من الدهر
أما هذه الطريقة أن تضع الأخت الإيشارب على مكياجها ونمصها وووو.. شكرا لها ولكن أن بمجرد ان تضع الإيشارب تخرج تتكلم عن :الحمد لله الذي هدانا لهذا وكيف هي سعيدة بحجابها وكيف نجحت في التغلب على نفسها فهذه ظاهرة غير صحية كما تعلم وكما ينبغي أن نعلم جميعا حتى لو كنا بعيدين عن تحقيق كامل الالتزام أو الاقتراب منه

ناهيك بقة يا عم خالد عن الكاميرات اللي بتقعد تلف وتيجي على وش دي ودموع دي وووو
أنا أعتقد أن النقاب ليس واجب وإن وجه المرأة ليس عورة -وزوجتي وقريباتي منتقبات - ولكن يحرم عليك النظر لوجه المرأة ناهيك ان يظهر هذا الوجه للعالم كله ناهيك عن المكياج والنمص والزينة الظاهرة وكل هذا الراجل ليس له ذنب فيه ولكنه الجو المودرن
وبعدين يا عم خالد الراجل ابتدا منذ فترة يغير اتجاهه ويقول إنه مصلح اجتماعي وليس داعية ده غير ملاحظات ناس كثيرون من المعتدلين مش من المتشددين عن موقفه من قضية الدنمرك
موضوع اللحية ده مش هو اللي الواحد يسقط داعية عشانه ولكن إذا كان سيحدث في طيات الحخير شر أعظم منه فيستحسن لا وخاصة بتوفر الدعاة الذين هم على هدي أقوم وبلاش نقول محمد يعقوب حاقولك وجدي غنيم حفظه الله وغيره الشيخ صفوت مثلا وووو
لكن تفرع عن هذه الموجة موجات أصغر وأصبحت ترى نماذج مصغرة منه يا أخي ده عقدوني في عيشتي حسسوني إني منافق وهم بيتكلموا عن الذوبان في حب الله والرسول والصحابة حسسوني انهم ملايكة وإني قلبي حجر وإنهم حققوا كمال التوكل وكمال الحب وكمال الخشية وكمال حب النبي وحب الصحابة
وفي النهاية أؤكد هذه أول مرة أقول هذا الكلام علنا ولك حذفه إن شئت فهو موجه لك أنت وأنا أحث كل من كان يستفيد وحيا قلبه منه أو من غيره ألا يعدم هذه الفائدة ولكن يحذر من مداخل نبهت لها في طيات كلامي ربما بأسلوب قاسي
اللهم اغفر لي وله ولصاحب المدونة ولجميع القارئين

رفقة عمر يقول...

السلام عليكم خالد
انا كنت بحب عمرو خالد جدا ولازت احب اسمعه فى سرد القصص والرقائق وكان اكثرمن رائع فى برنامج على حطى الحبيب
لكنى اخذت عليه اشياء شعرت انه يريد اسلام عصرى الم ترى برنامجه على المحور فى رمضان لا اتذكراسمه ولكنه حاجه شبيه بتلفزيون الواقع بنات وشباب فى كامب خارج بلادهم كان الكامب فى لندن والبنات والشباب فى اختلاط وبيناموا فى نفس المكان وكانت هناك بنات غيرمحجبات وبنات محجبات يرتدين البنطلون اللى كان قال مرة عنه انه مش زى اسلامى
للاسف الشهرة جعلته يريد ارضاءفئه معينه ويسهل فى الدين لدرجه غيرمحتمله
اليس الرسولالكريم قال
هناك دعاه على ابواب جهنم اوكما قال
اللى عايز يلتزم لازم يرضى بكل شرع الله مش يسهل فيها على هواه
قال تعالى
فمن شاءفليؤمن ومن شاءفليكفر

BinO يقول...

بصفتي سلفي
متشدد
رجعي
وانا من ضمن الناس اللي ليا تعليقات كتيرة علي الأستاذ المصلح
أحب أوضح لحضرتك نظرية الصورة
أن العين والمخ
بتوع البني أدمين بيحبوا الصورة جداً
بمعني لو ظهر رونالديهو مع جزمة كورة أديداس يبقي ديه من الأخر أجمد شئ في الكون
ماعلينا
نظرية الصورة أن اللي بتألفه العين بتتعود عليه حتي يصبح هو الصح
عمرو خالد في نظر البعض هو صورة الأسلام
يعني
كل ماتتكلم عن شئ صح أو غلط
يقولوا ما عمرو خالد قال
أو عمرو خالد عمل
خاصة في موضوع الأختلاط واللحية وظهور النساء المتبرجات
كل ما أتكلم مع حد في موضوع اللحية
يقولوا ماعمرو خالد مش ملتحي
الأختلاط ماعمرو خالد جايبهوهم مع بعض
وغيره
غير الأخطاء الواضحة للروايات والأعتماد علي أحاديث ضعيفة
والأغاني
وتامر حسني
صورة الدين
أنا لا أرضي أن تكون هذه صورتي
أنا متشدد

محمد عبد الغفار يقول...

اذا اجتهد العالم فأصاب فله أجرين و اذا أخطأ فله أجر
و هذا من كلام رسول الله صلى الله عليه و سلم

ليس مقام هذا المقال ، واعتقد ان فيمن انتقده من يبغى الأصلاح وليس كلهم قتله

والأخ عصفور لم يترك لى شيئاً اخر لأقوله

مسلم يقول...

السلام عليكم و رحمه الله و بركاته

الموضوع يتكتب فيه قصص و حواديت

و أنا شخصيا كان ليه بوستين عن البرنامج الجديد بتاع الأستاذ عمرو خالد
موجودين عندي علي المدونه لو حد حب يرجع ليهم

المهم بقه و بعد ما قريت البوست بتاعك يا خالد

أحب أقولك أنه ليس في كل الأحيان يكون للكلام عن الرفق و اللين و أخذ الناس بالأسلوب الهادئ يكون له مجال

فلكل مقام مقال...و عندما يرتبط الأمر بالإبتداع في شرع الله سبحانه و تعالي

يكون الأمر أشد خطراً من أن نأخذه باللين و التهاون

و لك المثل إذا ما أصيب أحد أصدقائنا بمرض خطير مثل السرطان مثلاً ... ساعتها لا مجال للتباطؤ أو التأخير بل نبذل كل غالي و نفيس من أجل الشفاء ...فما بالك بالأمراض التي تذهب بأمري الدنيا و الآخره

ثم يا أخي...ليست الفكره في أن الأستاذ عمرو خالد له أخطاء

لااااااااااااااااااااااااااااا

المشكله أن أخطاء الأستاذ عمرو خالد أخطاؤه منهجيه

أي أنها ناتجه عن إعتقاد و تصور لشكل الدعوه الإسلاميه

و أيضا ثيت عناده و تكبره علي آراء المشايخ المسموعين و المعروفين

فلذلك كانت الشده في النقد

أيضاً بالنسبه مثلاً لبرنامج الأستاذ عمرو الأخير

أظن أن الأستاذ عمرو عندما يقول (مالك كان بيعمل كذا) و (أبو حنيفه بقه شوفوا كان إزاي و الشافعي مش عارف إيه) أظن إن أبسط قواعد الأدب إن تذكر لقب الإمام قبل الكلام

أنا مش بتصدر في الهايفه...لكن الحكمه بتقول

إذا كان رب البيت بالدف ضاربُ فشيمه أهل البيت الرقص

يعني لما الأستاذ عمرو يتكلم عن الأئمه بهذا المنظر...أمال عوام الناس يقولوا إيه

طبعاً أنت ذكرت برامج مثل و نلقي الأحبه و علي خطي الحبيب و قلت أن أسلوب الأستاذ عمرو خالد فيها رائع و لي هنا نقطتان
الأولي : أن ليس وحده الأسلوب كافياً لنقبل الكلام أو حتي نشيد به
و لك أكبر المثل في أحاديث العالمانيين ...فهي أحاديث براقه تمتاذ بالمنطق و غلبه الأسلوب العقلاني و لها بريق إعلامي و لكن محلها الزباله

ثانياً : أن الحق مقبول من أي من جاء به

فلم يقل أحد مثلا أن كل كلام الأستاذ عمرو خالد خطأ في خطأ

و لكن قلنا أن ضرره أكبر بكثير من نفعه و هذا واقع غير قابل للإنكار علي الأقل في نظري و في نظر كثير ممن أعرفهم

أخيرا و ليس بآخر

الأستاذ عمرو خالد أعتقد إنه أصلاً إنكشف بعد ظهور الدعاه الربانيين في القتوات الفضائيه و ظهور قنوات مثل قناه الناس

إنكشف الأستاذ عمرو و إنخلعت عنه الهاله الإعلاميه أمام نور الحق متمثلاً في دعاه نحسبهم علي خير و لا نزكي علي الله أحداً

مسلم يقول...

بالمناسبه بالنسبه لمقوله العالم إذا إجتهد فأصاب فله أجرين و إذا أخطاء فله أجر

هذا بالنسبه للعالم

و الأستاذ عمرو خالد بشاهدته الشخصيه ليس بعالم و لكنه قبل سفره إلي إنجلترا كان يقول أنا داعيه

ثم بعد عودته قال أنا مصلح

مثله مثل أفلاطون مثلاً

ثم أن الإجتهاد له أصول فقهيه يجب توخيها

يمكنكم مقارنه موقف الأستاذ عمرو خالد قبل و بعد السفر بموقف الشيخ محمد عبده و رفاعه الطهطاوي

عندما عاد من فرنسا ليقول و يؤكد إنبهاره بطريقه الرقص الأوروبي و يشيد بما فيها من ليونه

و لا حول و لا قوه إلا بالله

أمــانــى يقول...

السلام عليكم
كل منا له أخطا وكل منا له عيوب وكــذلك مميــزات عمرو خالد يؤخذ عليه فى الكثير انا مش هتكلم لان تقريبا كده شيوخ المدونات اتكلموا الاستاذ عصفور المدينة والباشهمندس بينو اللى بصراحة شديدة بأثق فى كلامهم على الرغم أننى لست بسلفية ولكننى احب دينى واريد ان الله يوفقنى لما فيه الخير ويعز الاسلام والمسلمين و ربنا يثبتهم ويثبتنا جميعااللهم امين

انا هاتكلم عنه من وجهة نظرى الشخصية هو طالما حوله كثيرين فلابد ان يحرثهم على اكثر التزامآ وان يقول كلمة حق ولا يخاف لومة لائم هذا دين ولا يتجزاء كله متكامل مثل الحجاب وزينة المرأة خصوصا اللى من المفروض يكون فيها اكثر تشددآ
وبصراحة اننى فى الماضى كنت اسمعه وخصوصا ايام الجامعة بس الان لا استطيع ان اسمعه
ربــنا يهديه ويهدى دعاة امتنا ويكفيهم ويكفينا شرور انفسنا
اللهم امين
جزاك الله خيــرا يا استـاذ خالد على فتح هذا الموضوع

الطائر الحزين يقول...

بسم الله
انها المرة الأولى التي ادخل بها مدونتك عن طريق المصادفةالبحتة أول ما أقرأ اقرأ فى هذا الموضوع الشائك جوانبة
لست من العلم حتى انقض او أتعلل باحاديث واسانيد ودلائل وبراهين
لكن إن كان هناك حق لأقول رأيى فبسم الله وعفوا ان أخطأت
ان الموضوع له جانبان
جانب شكلى وأخر جوهرى
اما الجانب الشكلى واذا النصق هذا الشكل بالألتزام واخذة الناس على ان هذا هو المظهر لرجل الدين من حيث الشكل واللبس ويترسخ فى ذهن الأجيال ان اللحية ليس لها بد او انها مش واردة أخشى هذا مع العلم انى لا اقرن الالتزام باللحية او بالشكل عامة لكن اعتقد ان له دور فى الالتزام وان كان طفيفا انا معك ان هناك من شرح الله صدرة على يدية وجزاة الله خيرا على جهودة واجتهادة وكل على حسب نيتة
لكن من الظلم له ولغيرة ان يقارن وان يوضع بين صفوف العلماء رأساً برأس اعلم انه لا يضع نفسة هذا الموضع لكن الناس هى من تفعل هذا و تبدأ مقارنة بينه وبين الائمة ويكون له رأى وهم رأى المقصد ان يلتزم كل بمقعدة وبمكانة ويعرف حدود نفسة ارجو اكون قد استطعت ان اعبر عن ما آراه
وجزاك الله خيرا

نسرين - أمة الله يقول...

السلام عليكم
والله انا اخدت سنتين فى معهد الدعاه وتقريبا عمر خالد كان واخد نفس المعهد انا كنت بحس كل القصص اللى كان بيقولها مكتوبه فى الكتب بتاعتى
انا لا بحبه ولا بكرهه
بس كل اللى اعرفه انه اختص بفئه معينه من الناس بس فعلا قدر يحرك فيهم حاجه ويمكن ده كان سبب ابعاده عن مصر
بس من كلام ناس كتيره والله اعلم برضه انه اتغير الفتره الاخيره
على فكره انا بسمعله بالصدفه
على العموم النيات ديه حاجه بتاعت ربنا
بس برضه نحسبه على خير
اللهم انى اسألك من خير ما سألك به نبيك محمد عليه الصلاه والسلام
واستعيذ بك من شر ما استعاذ بهمنك نبيك محمد عليه الصلاه والسلام
ومتزعلش نفسك ربنا يكرمك ويكرم المسلمين اجمعين خير

Dr.khaled يقول...

طبعا كل الاخوة المتعصبين المتزمتين المتشددين الجعيين المتطرفين الارهابيين
علقوا :)
وأنا بصفتي متشدد زيهم

بقول آمين
الموضوع شائك جدا زي ما الباشمهندس قال
لكن...لازم نخوضه..ونقول الصح والغلط فيه
بكل ادب وعلم شرعي

khaled يقول...

محمد فوزى
شكرا لكلامك و لزيارتك
بس انت بتقول كنت سلفى و متشدد؟
هو انت صدقت كلام الاستاذ عصفور المدينة و د. خالد.؟
:)
اه انت ماكنتش قريت كلامهم جايز هما اللى قروا كلامك
يا عزيزى سلفى هم من يتبعون السلف الصالح و يتركون ما وراءه
هم من يدورون مع الدليل اينما وجد و لا يجاملون فى شرع الله احد
و بالرغم من انى عملت الموضوع انصافا لعمرو خالد الا انى اختلف معك فى حصر الدعوة بالشكل الذى يقدمه و الباقى تشدق بالكلام فقط
و كل له طريقته
حبيت بس اوضح ده

khaled يقول...

اخى أعصفور المدينة
اه يبقى انت اللى اخدت كلمة التشدد من محمد فوزى
:)
و بعدين الموضوع انا مش شايفه شائك و لا حاجة هو بس عاوز توضيح مش اكتر
و على رأيك كل واحد له اسلوبه و كل واحد له ما يعجبه
اما موضوع الحجة بأنه يركن الى الذين ظلموا و الدليل على حسب قولك انه لم ينزل به اى ضرر
اولا هو اجبر على الخروج من مصر لاسباب سياسية و الكل عارفها و مشهورة
ثانيا هى قاعدة ان الناس اللى صح لازم يكونوا متضررين؟
ماعتقدش
و اللى بيتابع البرامج دى مطلوب منه الفهم الصحيح
يعنى بتقول الناس اللى بيقولوا عمرو خالد عمل و سوى و كل حاجة يعملها عمرو خالد تبقى صح و هو ده الدين و بس و الاخت تحط قماشة على شعرها و تبقى مبسوطة انها اتحجبت و كل ده
انا شايف انه من جهل الناس و عدم استيعابهم لدور الداعية و انه مجرد مذكر
طيب فاكر الاقتتال اللى حدث بين احد المذاهب و الاخر فى العراق بسبب رفع الاصبع فى الصلاة
اعتقد انه بين اتباع احمد بن حنبل و اتباع ابى حنيفة
هل ده بيسئ للامامين الجليلين؟
و الا من جهل الناس و تعصبهم هو اللى عمل كده؟
انا ما بانكرش ان فيه ناس كتير كده و كمان بيعملوا حلقاته دستور ليهم و ينسوا العلم
طيب ما اكتر الملتزمين م بيسمعوا لمحمد حسان و محمد يعقوب و ما بيسمعوش لغيرهم و فيه منهم ما عجبهوش وجدى غنيم و نسيوا العلم و العلماء و عدوا الدعاة من العلماء و اخذوا الفتاوى من نصائحهم
يعنى لما ينصحه انه يعمل كذا زى صلاة الليل مثلا بيعتبروه من الواجبات الدينية و لازم تتطبق
ما يعرفوش يفرقوا بين النصائح و الرقاق و بين مجالس العلم
النماذج دى موجودة فى كل مكان استاذى العزيز مش بس مع عمرو خالد
و انا من اللى بيغلطوا عمرو خالد بخصوص قبوله التصوير مع مثل هؤلاء المتبرجات
و كمان قبوله لاستخدام الموسيقى فى التتر مش باقول دى مشكلة المعدين وحدهم
طيب مابالك لو عدل من هذه الاشياء؟
فى برنامج دعوة للتعايش انا سمعتله حلقتين
هو تخلص من معظم السلبيات اللى قلتها فوق و ناقص موضوع الموسيقى فى التتر و الا هى مجرد مهاجمة و خلاص و الغازية لازم تنزل؟
و كلامك ما فيهوش اى قسوة انا مستغرب من ده و كمان مش هاحذفه لانه شرف ليا انى احتفظ بيه
و اخيرا اقول على دعائك الجميل
امين امين امين

khaled يقول...

رفقة عمر
انا معاكى فى موضوع الكامب ده و ده ما يقبلوش اى حد عاقل
و انا الحقيقة ماشفتش البرنامج ده لكن الحق يتقال
هى الحكاية مش مجرد تعصب منى و خلاص و لو وصلنى انه فعلا رجل سوء مش هاتردد لحظة انى احذر الناس منه
انا عاوز الكلام عنه بموضوعية مش مجرد فرض رأى
شكرا لتنبيهك لى
وفقك الله

khaled يقول...

بينو
ايه ده هو انت كمان متشدد
اهلا يا زمل
:)
اقلك
موضوع الناس اللى بتتحجج بعمرو خالد و ان كل شئ بيعمله صح و ازاى بتقول انت غلط و عمرو خالد عمله انا ضده تمام و متفق معاك تماما فيه لكن يا عزيزى زى ما قلت لاستاذ عصفور المدينة
جهل الناس ده منهم هم و الجهلة كتير و مش مع عمرو خالد بس لأ دول حتى اخواننا الملتزمين بيعملوه مع مشايخهم
و انا مش بابرأ عمرو خالد على موضوع الرؤية و الختلاط لا و الله انا بس حبيت اتكلم بموضوعية و كمان تحفيز للناس انهم يتبينوا
يعنى ما ينتقدوش حاجة ما شافوهاش
لكن شهادة حد شاف و انتقد بناءا على شئ ثابت و رأى صحيح زى الاخت الكريمة رفقة فهو ده المطلوب و يجب الحذر على اساسه مش مجرد اشاعات
وفقك الله

khaled يقول...

محمد عبد الغفار
فعلا الاستاذ عصفور لم يترك لى انا ايضا شيئا اعلق عليه
:)
لكن الحديث ده كنت باستشهد بيه على امكانية خطأ العلماء الاجلاء مابالك واحد زى عمرو خالد؟
و ده وضحته فى البوست اللى بعد كده

khaled يقول...

مسلم
و عليكم السلام و رحمة الله و بركاته
حوادييييييييت
ما هو ده اسم مدونتى علشان كده كتبت عنه
:)
انا سبق و قريت الموضوعين دول و بما انى ما كنتش شفت البرنامج فماعلقتش عليهم ساعتها اما دلوقت ممكن اعلق و اعتقد فيما قلته لاخى عصفور و اخى بينو الكفاية و الخلاصة الشئ اللى انا بانتقده فيه هو الموسيقى لكن يا اخى انا شفت البرنامج و عجبنى لكن اؤكد على ان اللى بيسمعه لازم يتحرى الدقة لان عمرو خالد لم يتحراها فيؤخذ عليه ذلك و تحرى الدقة فى سماعه اننا ما ناخدش اى اراء فقهية يترتب عليها احكام من كلامه
و انا ما اقدرش احاسبه على نيته لانها يعلمها الله
اخى الكريم
انت قلت اخطاؤه المنهجية ياريت توضح لان الكلام عام ممكن يتفسر بحاجات كتير
و انا زى ما قلت انا ما اقدرش اعرف معتقده و نيته ازاى بتقول ناتجة عن اعتقاد؟
اما موضوع شكل الدعوة الاسلامية فأنا من اللى رأيهم انها مالهاش شكل محدد
يعنى مش لازم يكون اللى بيدعوا الناس يكون لابس جلبية
ممكن اقلك اللحية لان الرسول صلى الله عليه و سلم حث عليها لكن هل حث و اكد على شكل الملبس؟
انا ما باخوضش فى اراء فقهية لان ده مش مكانها لكن يا أخى باستشهد بيها
و كمان مع ان المسجد المكان الاساسى للدعوة بس برضه باقول انه ما اتحصرش الدعوة فيه
يعنى مش محصورة فى شكل خطبة على منبر
و الا ايه؟
ارجو تكون فهمتنى
وازاى ثبت عناده و تكبره على المشايخ المعروفين و امتى و ايه السبب
ارجو التوضيح اخى الكريم لالا نرمى بالباطل
و موضوع انه بيقول مالك و ابو حنيفة حاف كده
اقولك يا اخى انا ممكن اقول كده بس مش من باب قلة الادب لانى باستخدم اسمه مجرد لشهرته مش لسوء ادبى و انا مش شايف ان دى تؤخذ عليه و الا هى مجرد اننا نهاجمه و السلام؟
و انت فهمت كلامى عن العلماء غلط
انا ما باعتبرش عمرو خالد عالم
مين قال كده انا باعتبره بمن دون العلماء و ده وضحته فى البوست القادم اخى الكريم
و برضه باسألك منين عرفت نيته انه قاصد يعمل نفسه افلاطون؟

khaled يقول...

امانى
و عليكم السلام و رحمة الله و بركاته
امين يا رب
و احب بس اوضح انتى ليه مش سلفية؟
انتى ما بتتبعيش السلف الصالح؟
الصحابة رضوان الله عليهم و الرسول الكريم صلى الله عليه و سلم؟
هى بس مسمى لكن مش جماعة زى التبليغ و الا التكفي كده
ربنا يهدينا جميعا
شكرا لكى

khaled يقول...

الطائر الحزين
جزاك الله خيرا اخى الكريم و هذا عين ما قصدته من موضوعى النقد بأسلوب علمى و ليس مجرد شتائم
و انا لا اعده من العلماء
انا بس اتفهمت غلط
ووضحت ده
و كمان مش باصحح منهج الناس منه
بالعكس انهم مخطئون
شرفتنى بزيارتك و املى انها تدوم

khaled يقول...

نسرين امة الله
امين امين امين
اشكرك على زيارتك الجميلو على تعليقك و اسلوبك فى الحوار

khaled يقول...

د.خالد
و الله ده اللى انا قصدته
سلمت دماغك
بكل ادب و علم شرعى

مسلم يقول...

انا مقلتش ان قصده يعمل نفسه أفلاطون أنا قلت انه قال انه مصلح إجتماعي و نزع عن نفسه صفه الدعوه

khaled يقول...

اخى مسلم
و هل قالها صريحة؟

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro