امبارح كنت مسافر لمحافظة البحيرة سفر يوم واحد يعنى رحت و رجعت فى نفس اليوم ، المسافة لغاية هناك حوالى 100 كم (ميت كيلو) و متتخيلوش كمية الحفر و المطبات اللى كانت فى الطريق لأ و ايه مطبات غير صالحة للاستخدام الادمى و لا حتى اجدعها حمار يرضى يمشى فى الطرق دى
مطبات لا تخضغ للمواصفات القياسية و لا حتى لغير القياسية ، هتقوللى طب و ايه يعنى ما احنا متعودين على كده و مصر مليانة مطبات كتير؟ اقولك ان كل مطب من دول سواء اللى كنت بأنجح فى كشفه بوسيلة جهنمية او كنت بافشل و كان بيفاجئنى كان بيفكرنى بالمطبات اللى مالية حياتنا، ايوة مطبات ، مطبات من اللى قلبك يحبها ، مطبات تمام
هى لما تطلع واحدة تافهه بتشتغل مذيعة و بيقولو عليها دكتورة و تتكلم فى الدين و تتعمد انها تختار مواضيع بتسير البلبلة و تخلى راس المواطن البسيط يلف و يبقى مش عارف الصح من الغلط و تشككه حتى فى اكتر الامور بديهية يبقى ده مش مطب؟ اقولك ده خازوق و خازوق كبير كمان، مرة الهانم تتطلع تتكلم عن جواز المسيار و مرة تتطع تتكلم عن رضاعة الكبير و مرة تتكلم عن.... احم معلش مش هقدر اتكلم اصل انا بتكسف
اشمعنى المواضيع دى بالذات؟ هى ناقصاكى انتى كمان و ياريت بتستضيف حد عدل دى بتستضيف ناس زيها واخدين دكتوراه فى الهيافة و قلة الادب قولولى نعمل ايه فى المطب ده؟ مطب جامد صح؟
ممكن حد يقول ان دى مذيعة فى محطة فضائية يعنى مش كل الناس بتشوفها و كمان مش معقولة المواطن البسيط اللى ممكن يتأثر بيها انه يكون عنده دش!!! طب ايه رأيك فى مسئول كبير، كبير قوى و يهاجم الدين و الادهى انه المسئول عن العقول ،... عن اللى بيدخل العقول مسئول غسيل المخ ووزير الجهل؟
هناك تعليق واحد:
take care of yourself plz ya 7oksha :)
إرسال تعليق