ترجمة مواقع الإنترنت

الجمعة، يناير 05، 2007

عمرك شفت واحد احمق؟

لو شفت واحد مش عارف حاجة هتقول عليه ايه؟ جاهل صح؟
طب لو شفت نفس الواحد اياه (الجاهل بتاعنا) بيتكلم فى موضوع بيجهله هتقول ايه؟
انا اقولك هنقول عليه احمق صح؟ طيب تعالى نتخيل واحد جاهل و بيتحامق و بيتكلم فى الطب وواحد بيقوله بطنى بتوجعنى اعمل ايه؟ يرد عليه و يقوله حط فى عينك قطرة!! و....
- دماغى بتوجعنى...؟
- شرب ابنك الصغير شربة.
- عندى امساك....؟
اعمل كمادات.؟؟؟؟؟؟
منتهى الحماقة صح؟ ليه؟ علشان الدكتور بيقضى ست سنين من عمره فى كلية الطب و يشتغل فترة ويحضر ماجيستير و دكتوراه و يتخصص فى مجال معين ، يقوم يجى الاحمق اياه و يفتى فى (الطب) بكل بساطة .
يبقى اللى بيفتى المفروض يكون دارس و طالع عينه فى المذاكرة و بعدين يبقى يقدر يفتى!!
الكلام اللى فات طبعا كله قعد يشتم فى ابن الحمقاء و ازاى يفتى فى (الطب) . الطب طبعا من العلوم الصعبة اللى لازم تتذاكر فترة طويلة و بنحترم المهنة دى و ان حد سألنا نقوله مش عارفين احنا مش دكاترة.
طيب و الدين؟ يعنى اللى بيفتى فى الدين بدون علم؟ وللا الطب منقدرش نتعدى حدودنا فيه و الدين هو اللى بنقدر عليه؟ هو علشان قريتلك كتاب او اتنين وللا حديث او اتنين تقوم تعتبر نفسك عالم و تفتى كده بكل بساطة؟ عارف عمر بن الخطاب؟ قعد يدرس سورة البقرة لوحدها عشر سنين و ده عمر الصحابى اللى قال عليه الرسول لو كان نبيا بعدى لكان عمر!!! قد ايه علمه ده؟
الاحمق الحقيقى هو اللى بيعتبر نفسه "وكيل" عن الله عز وجل ويفتى و يحكم و كل ده علشان واخده غروره وازاى يقول مش عارف؟
عارف الامام مالك اتعرض عليه كام سؤال رد على 80% تقريبا بكلمة " لا اعلم" و ما اتكسفش.
ظهر اليومين دول كام واحد صحفى او مذيع او صحفية او مذيعة او حتى وزير و يتكلمو فى الدين. (وزراء جهل)
دول اللى قال عليهم الرسول (صلى الله عليه و سلم) ( سيأتى زمان على امتى .................و يتكلم الرويبضة ، قيل و من الرويبضة يا رسول الله قال الرجل التافه يتكلم فى أمر العامة)
عايز تكون رويبضة؟ عايز تكون تافه؟ اذن اتكلم فى الدين..
ساعتها تكون عملت زى الاحمق اللى حكينا عليه. ها عمرك شفت واحد احمق!!!!!

هناك تعليقان (2):

NoHeal يقول...

ايه ياعم الكلام الكبير ده أحمق وبتاع
الله ينور بجد بداية في الجوووووووووووووون

khaled يقول...

لأ و لسة فيه حماقات كتير لأن احنا فى بلد ديموقراطى ومن حق كل مواطن انه يمارس حماقاته

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro