القفا ده حاجة مهمة قوى كلنا طبعا فاكرين الستامونى اللى الف قصيدة على القفا و غناها المزاجنجى و كلنا ضحكنا عليها و ده طبعا فى فيلم الكيف
القفا يعنى الكرامة
القفا يعنى شكلك عند الناس اللى وراك
ازاى؟
لو الناس بتحبك هتبص على قفاك و هى مبسوطة
و لو كارهينك هايبصو على قفاك و نفسهم يتفوا عليك
واشمعنى القفا يعنى ما هو ممكن الوش برضه؟
لأ فيه ناس كتير بتكرهك و كل ما تبصلهم يضحكوا فى وشك لكن لو اديتهم ضهرك يلعنوا سنسفيل اهلك
يبقى القفا ده مهم و الا مش مهم بقى؟
و القفا عند الانسان هو الكرامة يعنى لو واحد ما عندوش كرامة بياخد على قفاه
و الشتاء فصل الكرامة
ازاى؟
مش فى الشتاء كل الناس بردانين و بيضطروا يغطوا قفاهم؟
يبقى عدد اللى بياخدوا على قفاهم هيقلوا؟
صح؟
لأ غلط
لا صيف و لا شتا احنا مش فارقه معانا احنا طول عمرنا بناخد على قفانا و ساكتين و لو حد اتكلم برضه هياخد على قفاه وفى ناس بتتطور معاها و بياخدوا على ............... قفاهم برضه
يا عم عديها و خليك مؤدب ايوه هى قفا القرد
هو احنا اتعودنا على كده خلاص؟
مفيش فايدة؟
مفيش حل؟
و حفاظا على القفا هقولها بصراحة
مش هخاف
هقولها و امرى لله
فليحيا البطيخ
البطيخ ده حلو قوى
انا زى أى مصرى عايش فى مية البطيخ
انا بحب البطيخ
انا بموت فى البطيخ
ليست هناك تعليقات:
إرسال تعليق