اكتشفت عالم المدونات ده من صديق عزيز و لما عرفت اسم المدونة بتاعته رحت قريتها و بعدين نسيت الحكاية كلها
بعد كده لما اتنشرت فضايح وسط البلد و التحرش الجنسى لقيت الصحف و القنوات الدشية ( القنوات اللى ع الدش يعنى) بتقول ان المواضيع دى منقولة عن احد المدونات و برضه نسيت الحكاية
و ف ليلة رأس السنة و على ما أفتكر انه كان تالت يوم العيد الكبير كنت بتابع موضوع عن تطوير المواقع و لقيت موضوع عن الاستضافة المجانية ، يعنى هيبقالى سايت ع النت ببلاش قمت فكرت كده ،، و ليه لأ؟ ما أعمل سايت و احط فيه اى حاجة و اهى تجربة و اطوره بعد كده براحتى!! قمت ما كدبتش خبر و رحت عامللى السايت بتاعى من غير فلوس
لما جه تفكيرى عند نقطة " من غير فلوس دى " افتكرت موضوع المدونات اللى قلى عليه صديقى بس كنت نسيت مكان مدونته
المهم وف نفس اليوم رحت عامل المدونة دى ، ما هى ببلاش ايه المانع؟
ايه المانع صحيح؟
مش حاجة ببلاش؟ ما استفدش منها ليه؟ و دى مش اول مرة افكر بنفس الطريقة لان قبلها بسنوات كنت عامل لنفسى ييجى سبعة تمانية اميل من ابو بلاش و مسجل نفسى فى عشرات المنتديات من ام بلاش و معظمها ناسيه طبعا و الاميلات ما بستخدمش منهم الا اتنين او تلاتة بالكتير
الحكاية دى بتفكرنى بحنفى ، جوز فوزية فى مسرحية سك على بناتك ، انا لقيت طابور طويل بحسبه جمعية قلت ازاحم يمكن اخدلى صابونة !! ادونى الصورة دى ، خدتها قلت يمكن تغلى
واحد يقرا الكلام ده فيزوى ما بين حاجبيه و تضيق عينيه و يرمينى بشرر يكاد يحرقنى و يقوللى ايه الهبل ده؟
اقول له بذمتك انت ما فكرتش بنفس الطريقة دى؟
هى يعنى المدونات دى لو بفلوس كنت هاتعملك مدونة؟
و الا كنت هتلاقى مدونات مليانة تهييسات و تخاريف كده؟
احب اقلك ، يا عزيزى كلنا هذا الرجل
كلنا حنفى
هناك 5 تعليقات:
كلنا حنفي؟
ماظنش
او على الاقل مش دايما
مش شرط ان الحاجه اللي ببلاش يعملها كل الناس
يعني مثلا التمشية في الشارع ببلاش
ماحدش بينزل يتمشي غير اللي عايز يتمشي
لو منتدى من اللي سجلت فيهم دول كان عارض مواضيعه بدون تسجيل او تقدر تعمل منه داون لوود من غير تسجيل
كنت سجلت ليه؟
هو تسجيله ببلاش
بس لو قراية الموضوع فيه ببلاش ماكنتش دفعت وقت ومجهود التسجيل
ماكنتش عملت المدونة دي دلوقتي
كنت عملتها من الاول خالص
من اول ما سمعت ان المدونة ببلاش
لازم يكون فيه هدف يحركك
لان اللي هدفه عبارة عن لا هدف
فممكن يوصل للاهدف ده عن طريق انه يعمل لا فعل
حنفي نفسه كان عنده هدف
ادخار الصورة عشان لما تغلى
بغض النظر هدفه كويس ولا وحش
لكن عنده هو كمان هدف
وانا متاكد ان انت كمان عندك هدف
والا ماكنتش تقعد تظبط في المدونة كل يوم بالمنظر ده
ماكنتش تكتب فيها كلمة
دور على هدفك بسرعة يا خالد
لان انت كاتب كويس
ونشيط
ولو فكرت في انك حنفي
هايجي يوم وتزهق من التدوين
وساعتها مش هاتعرف تفتكر هدفك من التدوين
فهتبطل تدوين
وساعتها احنا هانخسر-احنا اللي بندخل نقرا هنا يعني- وانت كمان هاتخسر
احنا هانخسر فكر وراي كنا بنقراه
يمكن بنستفيد منه يمكن نختلف معاه
لكن هانخسر مساحة من حوار العقول
وانت هاتخسر هدفك اللي انت هاتدور عليه دلوقتي
منتظر منك تدوينة بعنوان
هدف هذة المدونة
اولا اشكرك على كلامك الجميل و بحترم رأيك اللى دايما ما بتبخلش على بيه
ثالثا الهدف من المدونة دى واضح و هتلاقيه فى كل موضوع و مكتوب فى شريط الوصف
ثانيا كلامى مش معناه ان الكل كده
انا لما بتكلم فى حاجة بتكلم عن نموذج من الناس فمثلا لما بتكلم ع الاحمق ده مش معناه ان الكل حمقى و لما بتكلم عن الغبى ده مش معناه ان الكل كده و بالرغم ان انا قلت ان كلنا حنفى فهو يتعرف من الرد على السؤال اللى فى الموضوع : هو لو كانت المدونات بفلوس كنا زماننا بنتكلم كده؟
اشكرك جدا و احب اقلك ان انا قصدت اقول ثالثا قبل ثانيا علشان حبيت ارد من اخر كلامك لاوله
و بعدين حنفى حنفى مش مهم بدام بنتكلم و نتواصل كده
فلوس؟
انت بتقول فلوس؟
يعني ايه الكلمةدي يا اونكل؟
اوعى تكون كلمة أيااااااا وعييييب
إرسال تعليق