ترجمة مواقع الإنترنت

الاثنين، مايو 07، 2007

انت فاهمنى؟

من شوية اشتريت كتاب اسمه القواعد الاساسية للنحو و الصرف و ده كان عندى من زمان و ضاع منى للاسف
قعدت ادور عليه لغاية ما لقيته بالصدفة عند واحد بيشترى الكتب القديمة و بيبعتها للمحرقة
المهم
فتحت الكتاب و لقيت موضوع فى اخره اسمه علامات الترقيم
بيحكى عن العلامات زى النقطة و الشرطة و الاقواس
افتكرت تعليق لاحد المدونين مش فاكره فى مدونة تانية مش فاكرها برضه
تعليقه زعل صاحب المدونة و رجع علق تانى و اعتذر وقال انه ما كانش يقصد و الكلام ما بينقلش الصوت لانه ما فيهوش تون و نغمة و كده
كان كلامه جميل و معبر
فعلا الكلام المكتوب ما فيهوش تون مافيهوش نغمة يتعرف بيها قصد المتكلم ان كان زعلان و الا فرحان و الا متضايق و الامبسوط
طب ايه الحل؟
بسيطة
علامات الترقيم يا اخواننا
يعنى مثلا علامة التعجب
!
من اسمها يتعرف استخدامها
تستخدم للانفعالات النفسية و للكلام المثير للدهشة
و مثلا الشرطتان
- -
او القوسين
()
و يفيد فى الكلام الاعتراضى و هو الكلام اللى مش تبع الموضوع او اللى بيفسر كلمة او اى حاجة مش فى سياق الموضوع
اعتقد ان فى ظل استخدامنا للكمبيوتر و لادوات الكتابة الجاهزة بقينا ممكن نستخدم طرق تانية للتعبير مع علامات الترقيم زى التلوين او تكبير الخطوط او امالتها او عمل الخط عريض
يعنى انا لو عايز ازعق و اقول ياعالم ياهووووه ممكن اكتبها بحرف كبير زى كده
ياعالم ياهووووه
و كمان لونته بلون احمر غامق للدلالة على الغضب او الانفعال
و لو عايز اهمسلك ابقى اصغر الخط زى كده وش وش وش و كمان لونته بلون هادى للدلالة على الهدوء و السكون

هناك 31 تعليقًا:

ammola يقول...

؟؟؟؟؟؟؟؟؟؟؟؟؟؟
"""""""""
>>>>>
!!!!!!!!
شفت بأه انا فاهمه ازاى

عصفور المدينة يقول...

سبقتني
ده كان البوست القادم لي عن اللغة العربية الله يسامحك

كتاب القواعد الأساسية أحسن كتاب في النحو معاصر فعلا وهو على ايامنا كان بيتسلم في المدارس في أولى ثانوي بحيث يكون معاك على طول زي الأطلس

عصفور المدينة يقول...

القواعد الأساسية في النحو والصرف
ده الكتاب حجمه 10 ميجا بس هو 256 صفخة

إنـســانة يقول...

ما شاء الله

العلمُ نورٌ

يا مراكبي يقول...

على فكرة الموضوع ده جميل جدا ومعظم الناس بتجهلة

ولسة كمان فيه علامة الإستفهام والفاصلة والفاصلة المنقوطة والنقطتين فوق بعد

ولو بتكتب على الوورد هتلاقيه بيعملك خط أخضر تحت أخطاء الترقيم زي لو سيبت مسافتين بدل مسافة واحدة .. وزي لو سيبت مسافة بين الكلمة والفاصلة .. بصراحة .. الموضوع ده كبير قوي وسهل ولذيذ في نفس الوقت

غير بقى زي ما إنت قلت إن فيه دلوقت طرق تانية زي الأمثلة اللي إنت قولتها وكمان الأوجه اللي بنستخدمها في الماسينجر

david santos يقول...

Thanks Khaled!

My life is to make to exceed the barrier of the languages against the lie and the evil

لحظة يقول...

شكرا لك
ممكن سؤال؟
هل وجود النقاط المتتالية في النص صحيح ام خطأ
يعني مثلا اكتب.. ثم اكمل في محاولة اعمل فاصل بين الكلمات
ام ان هناك علامة اخرى تغني عنها
لانني استعملها كثيرا ولا اشعر ان الفاصله العادية تعطي نفس التأثير

Mohamed A. Ghaffar يقول...

نحو وصرف وترقيم!! هو انت كنت علمى؟

شادي فايد يقول...

لالالالالالالالالالالالالا
مش فاهمك
؟؟

أمــانــى يقول...

السلام عليكم
وبما انى بليدة فى اللغة العربية فيبقى معايا ماجاتش على علامات الترقيم ههههه
لان العربى عندى ما يعلم بها الا ربنا
:D

khaled يقول...

امولة
وات دو يو ساى؟
بس انتى ليه مش عاملة مدونة؟

khaled يقول...

أ عصفور المدينة
معلش بقى اللى سبق و انت اكيد هاتكتب بطريقة احسن
و هو فعلا كنا بنستلمه فى الثانوى لكنه ضاع منه و الحمد لله لقيته تانى
و شكرا ع الكتاب الجميل ده

khaled يقول...

انسلنة
العلم لا يكيل بالفراولة
:)

خمسة فضفضة يقول...

السلام عليكمورحمة الله وبركاته

نحو وصرف تاني دا احنا ما صدقنا خلصنا دراسة

ايام المدرسة كان فيه فريق الصحافه وده اللي كان عاوز ينضم له كان بياخد حاجه زي كورس كده في طرق الكتابه من مدرس العربي المسؤول عن الفريق ، عن علامات الترقيم والحاجات دي ، يعني ....

الواحد لسه فاكرهم طشاش
بس بيني بينك علي الكمبيوتر بستسهل الكتابه من غيرهم للسرعه ليس اكثر

تحياتي

khaled يقول...

يا مراكبى
الله يخليك
و اللغة العربية فيها حاجات كتير حلوة بس انا باختصر
و الابتسامات اللى فى المسينجر سهلت علينا حاجات جديدة و بقت بتعبر اكتر

khaled يقول...

david santos
thank u
yes the languages is not a barrier against truth and good manners

khaled يقول...

لحظة
ربنا يخليكى
مش عارف النقط خطأ و الا صح لكن الفاصلة العادية هى اللى بتتحط بين الجمل المتتابعة و نهايتها بتتحط نقطة
و الفاصلة المنقوطة بتكون بين الجمل اللى بتبقى سبب لبعضها يعنى جملة سبب لجملة تانية

khaled يقول...

محمد عبد الغفار
اه تصدق؟
:)

khaled يقول...

شادى فايد
بعد ما اكلت من التورتة؟
ماشى
:)

khaled يقول...

امانى
الله يكون فى عون العربى
ههههههههههههههه

khaled يقول...

خمسة فضفضة
و عليكم السلام و رحمة الله و بركاته
معلش بقى فكرتك بالمدرسة اللى انا كمان كارهها
بس فكرة حلوة انه ياخد زى كورس قبل ما يكتب حتى علشان لما ييجى يكتب يكتب صح

Shiko يقول...

بوست جميل
جزاك الله عنا خيرا

كراكيب عادل يقول...

وش وش وش

دي لازم تنزل في كتاب حالا

اصلها معبرة

ههههههههههه

انت اية حكايتك مع النحو

بس استمر انا عايزك تشوف الكتاب دة وتختصرة هنا مش كلنا هنعرف نجمعة زيك

اهو موضوع نستفيد منة زي مدونة التعليم بتاعتك دي كل ما ادخل عند حد القاة بيشيد بيها

ربنا يوفقك يا خلوووود

رفقه عمر يقول...

انا ضعيفه جدا فى اللغه العربيه وكنت دايما اسيب سؤال النحو وكمان سؤال الشعر يعنى اذكر هنا تشبيه او استعاره لغايه دلوقتى لا اعرفه افرق بين الصفه والحال والمضاف اليه يعنى بجد لو قدرت تعرفنى الحاجات دى بس ياريت بتبسيط شدييييييييد جدا يبقى جزاك الله كل خير

عاشقة الوطن يقول...

خاااااااااااالد
بجد انا اسفة بقالى كتير مادخلتش اى مدونة عشان والله مش لاقية وقت خالص
انت عارف بقي اصل انا لسه طالبة
والمذاكرة بقي

عموما يسيدى الموضوع ده فعلا مهم
لان احنا ساعات مش بنقدر نتحكم فى اسلوب الكلام اللى احنا بنكتبه
او ممكن نكون قصدنا حاجة والناس تفهم حاجة تانية

بس بعد الدرس ده يبقي عيب علينا لو غلطنا تانى

شكرا على الموضوع ياخالد

سلااااااام

khaled يقول...

شيكو
جزانا الله و اياك
شكرا لمرورك الكريم

khaled يقول...

عادل
هههههههههه
فيه تعبيرات تانية لو حبيت
معلش بقى اصل باحب اللغة العربية و النحو
و ربنا يسهل فى موضوع الاختصار ده
ربنا يوفقك يا باشا

khaled يقول...

رفقة عمر
ان شاء الله ربنا يسهل بس عليكى التركيز
:)

khaled يقول...

عاشقة الوطن
يا ستى ما فيش اسف هى بس الواحد بيحب يطمن عليكى و اهم حاجة تكونى بخير و ربنا يوفقك فى الامتحانات
و لما نشوف بعد الامتحانات هانكتب ازاى
:)

3araby يقول...

فعلاً هام جداً ان نعتنى بلغتنا العربية , ونعرف ازاى نستخدم النحو و الصرف صح فى كتاباتنا , لأن ما يعبر عنا هو ما نكتبه .... ولكى يفهم من يقرأ ما يجول بخاطرى يجب أن أساعده وهذا يأتى بوضع علامات الترقيم فى أماكنها الصحيحة ؛ وكذلك تغيير الكتابة بتغيير اللون أو حجم الحروف.

على فكرة الأمر ده مش سهل لكن مع التعود والممارسة بيبقى سهل بعد كده , وبيوفر علينا كتير فى التعبير عن كتاباتنا .

شكراً على الموضوع الجميل ده .

Lamiss Ibrahim يقول...

nice
http://www.kuwait.prokr.net/cleaning-conditioners/
http://www.kuwait.prokr.net/

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro