ترجمة مواقع الإنترنت

السبت، مارس 10، 2007

اميل

من كام يوم جالى اميل و اول حاجة لاحظتها انها مبعوتة من ييجى تلاتين تلاف واحد الى تلاتين تلاف واحد برضه
و عنوانها ارجو نشرها فى جميع المنتديات و دلوقت الاقى ناس بينشروها فى مدوناتهم و بيبعتوها لبعض علشان ياخدوا ثواب
الاميل بيقول ان جريدة اسبانية بتجرى استفتاء حول ماهي الشخصية الكبيرة التي لها تاثير على البشرية ومن تلك الشخصيات الحبيب المصطفى صلى الله عليه واله وسلم وباقي الانبياء كسيدنا عيسى وعدة شخصيات اخرى و ان الاعلى تصويتا سيجرى اعداد برنامج عنه
طيب دخلت الموقع بتاع جريدة الموندو الاقيه باللغة الاسبانية
كل حاجة فيه بالاسبانى
فتحت بقى ووقفت شوية لغاية مالمحت كلمة ماهوما
Mahoma
طيب
انا ما بعرفش اسبانى اوك
الاسم ده بتاع مين؟
غلطانين فى الاسم؟
و على فكرة ده واخد اعلى تصويتات 84% ارجو انه يكون فعلا هو الرسول صلى الله عليه و سلم
ايش درانى على انه فعلا اسمه؟ طب تعرفوا انتوا؟
قبل ما تصوتوا اتأكدتوا؟
طيب لو طلع صح مين اللى هايعمل البرنامج ده؟ و لمين؟
الاميل بيقول كى يتعرف عليه الاسبان و الاوروبيين
هيجيبوا المعلومات عنه من مين؟
و هيقولوا ايه عنه؟ طب هايسماحولنا نفتش عليهم؟ قصدى نبدى استياءنا لو لاقينا فيه حاجة غلط؟
نافوخى يا عالم

هناك 14 تعليقًا:

ma 3lina يقول...

الإيميلات بتاعة انشرها على كل من تعرف دي بتغيظني جداً .. أنا مش حزود عن كده .. عشان أنت عارف رأيي في الحاجات دي ..

غير معرف يقول...

kalamfaregh.blogspot
يابنى هوه انت كده بتدور على الحاجات اللى تغيظك.... هوه اينعم انت عندك حق بس صهين اشمعنى دول يعنى اللى هاتحطهم في دماغك
وبعدين انت كنت قالبها مدونه طفال من كام بوست
عيش حياتك يا عم ولا يهمك
ملحوظه: ارسلها لكل اللى تعرفه
هههههههههههههههه
مها

غير معرف يقول...

الناس فاضية مش عارفيين يعملوا ايه .. بس الرسائل دى مستفزة وساعات كمان بيكون فيها اشاعات وكلام كدب
بس حضرتك لو عايز تعرف الكلام ده مظبوط ولا لاء ادينى الموقع ولينا زميل مدرس اسبانى علشان نشوف الموضوع ده وعلشان لو الموضوع غلط يبقى تبعت للناس اللى بترسل الحاجات ولازم يصحوا شوية ولاهما فاكريين الحسنات هتجى لما يرسلوا وخلاص

كراكيب عادل يقول...

متروحش هناك يا خالد

وبعدين انت تأمر اعملك استفتي عندي وباللغة العامية كمان اصلي بحبها موت


وادبحلك فرختين بعد ما تخلص استفتا

كلام لوجيك يقول...

احييك يا خالد على دماغك الموزونه
انا من النوعيه اللى بتحب تتأكد من الحاجه الاول
ما أحبش اعوم مع التيار وخلاص

فعلا كلامك مظبوط
وممكن بسبب تسرعنا وعدم تفكيرنا فى بعض المواقف انها تجيب تأثير عكسى ضار

وانا كمان مش من هواة قراءة البوستات الطويله
لإن الحياة المتسارعة اللى احنا بنعيشها لا تعطينا اي فرصه لإلتقاط الانفاس
وكمان بسبب الاصدقاء الكثر من الاخوة البلوجرية الذين نداوم على قراءة ابداعاتهم

تحياتى لكم جميعا
ودمتم بألف خير

Hannoda يقول...

ماعرفش عندي حق في تجاهل كل الإميلات اللي بتيجي بالشكل ده ولا لأ

بس بحسها كلام فاضي و يمكن الخوض فيها بدون فهم وتأكد بحسه كإ ني في قطيع مش عارف جاي منين ولا رايح فين

لكن فكرة انك تدور و تعرف وتفهم أوله من آخره؟؟

ده حاجة أحييك عليها و ماعتقدش فيه كتير إنتبه لها.. أكيد ده خطوة أف ضل من التجاهل بكتيير

khaled يقول...

ما علينا
طبعا يا باشا انت استاذى
مها
طب اعمل ايه كل ما اتلفت الاقى فى وشى حاجات كتير زى كده
و انا لما باغلب باقلبها اطفال علشان ما اضربش
امانى
مش مسألة ترجمة انا ترجمته للانجليزى ولقيته عن الناس المؤثرة بس طبعا الاسم ماهوما ده معرفوش و كمان مش ده
الاعتراض فى انهم يعملوا البرنامج بنفسهم بدون الاستعانة بالمسلمين

يا مراكبي يقول...

على فكرة .. انا ياما جات لي حاجات غريبة وفيها كلام عن معجزات وخلافه وتلاقي أمة لا إله إلا الله بعتاها لكل البشرية .. ولو إتحريت شوية عن الحاجة دي أو رحت تتأكد عنها إنها مظبوطة .. تلاقيها حاجة كفتة ومش حقيقية

والواقع إن اللي بيألفها بيكون حد من خارج أمة الإسلام ويقعدوا يضحكوا علينا من سطحيتنا وتفاهتنا وجهلنا

إزيك كده؟

khaled يقول...

عادل
بجد؟ طب هاتحطنى اول واحد
هههههههه
اسامة
دمت بالخير
و الحكاية دى بتحسسنى اننا شغالين بالريموت كل ما يدوسوا ع الزرار نشتغل

khaled يقول...

هنودة
بدل التجاهل نتأكد الاول و بعدين نقرر ما نتسرعش
و شكرا لكلامك الجميل
يا مراكبى
ازيك بجى
العملية وسعت قوى
كل يوم ييجى اميلات كتير زى كده
ما علينا

عاشقة الوطن يقول...

بص ياخالد انا لسه ماجليش الميل ده
بس لما يجى اكيد كنت زيي زى اى حد مالوش فى الاسبانى وانه المفروض هيصوت على حاجة معينه هيصوت
ده عيبنا
للأسف

تحياتى ليك على حرصك الشديد على التوضيح

khaled يقول...

عاشقة الوطن
هى دى اقل حاجة ممكن نعملها مع الحاجات دى لان ممكن بحسن نية اساهم فى الاسائة من قريب او من بعيد للدين
لازم نخلى بالنا
شكرا لاهتمامك

BinO يقول...

أنت يا أبني بتتشتاق عشان تتغاظ
:)
كلامك صح
والأكثر من ذلك يجي ميل فيه صورة سمكة عليها أسم الله
طبعاً مبنستبعدش ذلك علي الخالق عز و جل
بس الكل يأعد يفرود في الرسالة من غير ميتأكد
وفي الأخر واحد أي كلام يجي يطلع لسانه و يقول أنه عاملها بالفوتو شوب
كمان فيه رسالة أنتشرت من فترة عن مواقع بتتكلم بأسم الأسلام و لكنها مواقع يهودية هدفها تشويه صورة الأسلام
الرسالة كانت بتتبعت مع التأكيد علي المستلم بضرورة نشرها
طب يا جماعة
مأحنا بنعمل لهم دعاية مجانيه
أه يانفوخي
أديني أتغظت زيك ياعمنا
ويجعله عامر
وسلملي علي المترو
وجزاك الله خيراً

khaled يقول...

bino
احب اقلك ان المترو برضه بيسلم عليك و مشتاق جدا يشوفك
و تحب تشوف ايه فى برنامج ما يطلبه المدونووووووووون؟
احنا باين علينا كده بنحب ناكل على قفانا
و الا ايه؟

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro