ترجمة مواقع الإنترنت

الجمعة، فبراير 02، 2007

كنا عيال



بريللا بريللا بريلليلا


***


لاعبينى و الاعبك


لاكسر صوابعك


صوابعك اللولى


فى طبق بنورى


***


افتحولى الباب ده


الجاموسة واااالدة


***


واحد اتنين تلاتة


ابرة الخياطة


خيطيلى كمى


اوعى تقولى لامى


امى تقول لابويا


ابويا يضربنى


و الخروف ينطحنى


***


واحد اتنين سرجى مرجى


انت حكيم و الا تمرجى


انا حكيم الصحية


العيان اديله حقنة


و المسكين اديله لقمة


نفسى ازورك يا نبى


يا اللى بلادك بعيدة


فيها احمد و حميدة


حميدة ولدت ولد


سميته عبد الصمد


***


يا فار يا بنى


اوعى تاكلنى


كلنى بالليل


الساعة اتنين


رحت للقاضى


قاللى مش فاضى


رحتله تانى


قرقش ودانى


ااه يا ودانى


***


كانت ايام جميلة


ايام كلها لعب


كنت زى ما بيقولوا كده مقرون و هى كانت لسة بضفاير


مش عارف ايه اللى خلانى اكتب الكلام ده


يمكن عايز افتكر الايام الجميلة


ايام الطفولة البريئة؟


يمكن عايز اهرب من واقعى


يمكن مش عايز افكر فى مستقبلى؟


هيكون شكله ايه؟


هو انا لما كنت صغير كنت فاكر ان انا مش هاكبر


هو انا كنت فاكر ان انا مش هاتحمل المسؤولية فى يوم من الايام؟


كنت بافكر فى اللى بيتعمل فينا؟


من اعدائنا؟


من اعداء ديننا؟


مش عارف ازعل علشان كبرت و الا احسد نفسى ان انا كنت صغير


بس لى سؤال


هو الطفل فى العراق كان بيلعب زيى كده؟


كان بيغنى و فرحان زيى؟


كان ليه اب بيصرف عليه؟


كان ليه ام بتاخده فى حضنها؟


كان ليه اخ كبير يعلمه؟


كان بيروح مدارس؟


و الا ما عرفش فى حياته الا البكاء و صوت الرصاص؟

هناك 21 تعليقًا:

ma_3alina يقول...

هي الأمور كما شاهدتها دولٌ * من سرَّهُ زمنٌ ساءته أزمانُ
وهذه الدار لا تبقي على أحد * ولا يدوم على حال لها شانُ
فجائع الدهر أنواع منوعة * وللزمان مسرات وأحزانُ
يا من لذلةِ قومٍ بعدَ عزِّهُمُ * أحال حالهمْ جورُ وطغيانُ
بالأمس كانوا ملوكًا في منازلهم * واليومَ هم في بلاد الضدِّ عبدانُ
فلو تراهم حيارى لا دليل لهمْ * عليهمُ من ثيابِ الذلِ ألوانُ
ولو رأيتَ بكاهُم عندَ بيعهمُ * لهالكَ الأمرُ واستهوتكَ أحزانُ
يا ربَّ أمٍّ وطفلٍ حيلَ بينهما * كما تفرقَ أرواحٌ وأبدانُ
وطفلةٍ مثل حسنِ الشمسِ * إذ طلعت كأنما ياقوتٌ ومرجانُ
يقودُها العلجُ للمكروه مكرهةً * والعينُ باكيةُ والقلبُ حيرانُ
لمثل هذا يذوبُ القلبُ من كمدٍ * إن كان في القلب إسلامٌ وإيمانُ

الأبيات لأبي البقاء الراندي

أبو أمل يقول...

ياااه
بالأمس كنت أغنى لأمل وحاولت تذكر هذه الكلمات لم أستطع
وقررت العوة إلى المراجع لدى لتذكر هذه الأغنيات
أرحتنى يا رجل وأعدتنى لذكريات تقبع فى دهاليز الزمن
تحياتى

رفقه عمر يقول...

ماشاء الله عليك لسه فاكر انا مش فاكرة غير اول واحدة بس منهم عارف انا لما اكون حزينه قوى الحاجه الوحيدة اللى بتخرجنى من حزنى هو تذكرى لايام الطفوله وتصدق بجد بحس بنفس المشاعر ساعتها واضحك على كل حاجه كنت باعملها وبعدين مش اطفال العراق بس اللى مش عايشين طفولتهم لكن اطفال فلسطين ايضا ربنا معاهم ويعود الامان تانى فى كل بلاد المسلمين

amany يقول...

الله على ايام الطفولة كم الانسان فى حاجة اليها ولكن ليس للطفولة بعينه لانه مستحيل ولكن على ما اعتقد ليس من المستحيل العيش بمشاعر وبراءة الطفولة حتى لو لبعض ساعات او ايام

khaled يقول...


ما علينا
ايه الجمال ده
قصيدة جميلة و بتوصف اللى احنا فيه بدقة
شكرا لك
ابو امل
تحياتى لك و ربنا يخليلك امل
رفقة
انا برضه بحب افتكر الايام دى و المرة دى قلت افتكرها معاكو
و انا ما نسيتش الفلسطينين و لا حتى كل الدول الاسلامية لان كلهم اهلى انا قلت العراق بس كمثال
و يارب يرجع الامان تانى
امانى
فعلا و ده الدليل اهو عيشنا مع بعض لمدة دقائق ايام طفولة بريئة و جميلة ما فضلش منها الا الذكريات و مستحيل ترجع تانى

IRAQ Sawt Alhaq يقول...

أخ خالد شكرا لاهتمامك ولكني أستشرت في الحكم الشرعي وقالوا ليس هناك حرمه اذا كان الغرض جعل العالم يعرف مأساة الاسري وعلي التنبيه عن المشاهد والاعمال بالنيات والتقصير جاء من الاعلام العربي المقصر الذي جعلنا نلجاءللمصادر الغربية و لله الامر من قبل ومن بعد

IRAQ Sawt Alhaq يقول...

خالد جزاك الله خيرا علي تذكرك الدائم للعراق وأطفاله والان في بغداد أهل السنة يموتوا جوعا فهم محاصرون منذ شهور بلا دواء او طعام او تدفئة عشرات الاطفال ماتوا من البرد
لا اله الا الله

khaled يقول...

اخى عمر
جزاك الله خيرا على اهتمامك بالجانب الشرعى و لكن اخى ما هى ادلة هذا الحكم و هل هو صادر ممن نثق فى حكمه؟
اخى كل ما املكه هو النصيحة فاذا كانت هناك فتوى صادرة ممن نثق فى علمه و خلقه و حكمه فسوف نقبل و انصحك اخى بالتنبيه على ذلك حتى يعرف الناس قبل الدخول ليتحملوا وزرهم ان وجد
و حزنت فعلا عما يعانيه اخوانى العراقيين و غيرهم من الجوع و التشرد
فى الوقت الذى نعيش امنين و مطمئنين على قوتنا
حقا مخزية لنا جميعا
اخى العزيز لم تخبرنى هل وصلك الاميل ام ماذا؟

camera_girl يقول...

كنت مش مسدقه انك فاكر الكلاام ده كولو سكر جدا ياااااااااااااااااااه انا لحقتلى كام اغنيه من دول كانت ايام جامده صحيح بس ايام ما كانت مفتكرش ان الواحد نفسو يرجعلها ولا يرجع لأى مرحله عدت الواحد عاوزهم يخلصوا اصلاا

اما بالنسبه للى فالعراق فأفتكر انهم ابتدو يتكيفو مع الرصاص واهتمامتهم اختلفت عننا لكن مفيش طفوله خلااص اكيد دلوقتى الطفل بيقول بابا وماما وبيتعلم الكره والأنتقام ربنا يكشف عنهم الغمه اللهم امين

khaled يقول...

امين يا رب
شكرا لزيارتك

الأباصيرى يقول...

على رأى مارى منيب

فكرتنى باللذى مضى

قعدت أضحك وأفتكر ايام زمان وأنا بقرا البوست دة

تحياتى

الأباصيرى يقول...

أة صحيح بالنسبة للعراق

الموضوع مختلف كلياً

هيلعب أزاى ويفرح ازاى وكل بيت فية قتيل أو جريح أو معتقل

طبعا الأجابة لأ مبيعرفش اللعب وكل اللى بيعرفة الخوف

khaled يقول...

اباصيرى
اضحك الله سنك يا فتى
فعلا كل اللى بيعرفه الخوف بس تفتكر احنا هنفضل لغاية امتى نحس بالامان؟

camera_girl يقول...

بحبك وحشتينى بحبك وانتى نور عينى ده وانتى مطلعه عينى بحبك موووووت

الأغنيه دى اتصورت احسن مالفيلم اتصور والفيلم كولو مفيهوش غير اغنيه ويارب ما يجى اليوم الى الخوف يقتلنا فالبلد دى اكتر من كده يعنى

tony يقول...

عزيزي خالد
اشكرك من كل قلبي علي هذة اللحظات القليلة التي استرجعنا فيها زكريات الطفولة الجميلة واشكر اخوتي علي مشاركتهم بهزة الكلمات الجميلة

ان اطفال العراق وفلسطين وكل طفل في ارض غربتنا لجدير ان نتزكرة دائماً وندعو الله عز وجل ان يعم السلام بلادنا العربية والعالم كلة فهناك ايضا اطفال الصومال و جنوب السودان وربما اطفال في اماكن اخري يواجهون اخطار المجاعة والموت وغيرها
اشكرك عزيز من كل قلبي وندع الله ان يعم الايمان و المحبة القلوب

khaled يقول...

تونى
نورت
وانا طبعا اتكلمت عن اطفال العراق كمثال و ما نسيتشى بلادنا التانية

koukawy يقول...

اه ماكانش الواحد في السن دي بيشيل الهم زيّ دلوقتي

khaled يقول...

كوكو
نورتى
كانت ايام جميلة صح؟

ذو النون المصري يقول...

اغنيات فترة الطفوله كانت رائعه جدا
انا فاكر اغنيه كانت بتقول
الجوز الخيل ..و العربيه
سوق يا اسطي لحد الصبحيه
علي راسي يا هانم و عنيه
...و مش فاكر
فيه غيرها بتقول
ياحضرة العمده ابنك حميده حدفني بالسفنديه
وقعت علي صدري ضحكوا عليا تلاته افنديه
يرضيك ياعمده
لالالالا
عشان ابن عمده
لالالالالا
يعمل كده كده كده فييه
و مش فاكر الباقي
ياريت لو فاكرهم تقولي عليهم لانهم مهمين جدا بالنسبه لي

khaled يقول...


ذو النون المصرى
نورت ياباشا
اغنية الجوز الخيل كانت بتيجى فى الراديو زمان و صوروها كارتون و مش فاكرها كلها بس ان شاء الله هادورلك عليها
اما بخصوص ياجضرة العمدة فبتتقال كده
يا حضرة العمده ابنك حميدة حدفنى باستافندية
اهى؟
وقعت على سدرى ضحكوا عليا زملاته لافندية
اهى؟
يرضيك يا عمدة؟
لا لا لا لا لع
عشان ابن عمده؟ لا لا لا لا لع
يعمل كده كده كده فيه
يا ابو حميدة
حصل ايه
ابنك حميدة
عمل ايه
يا ابو حميدة
حصل ايه
ابنك حميدة
عمل ايه
يعمل كده كده كده فيا
يرضيك يا عمده لا لا لا لا لع
عشان ابن عمده
لا لا لا لا لع

khaled يقول...

اهى لقيتها

الجوز الخيل والعربية

انغامهم كلها حنية

سوق ياسطى لحد الصبحية

على راسى ياهانم وعنيا
الاسطى عاجبنى يامحلا غناه

والدنيا ياروحى ماهيش سايعاه

فرحان بالخيل اللى مانساه

وحياته فى الدنيا هنية

سوق ياسطى لحد الصبحيه

على راسى ياهانم وعنيا
ان شد السرعة بايده يمين

بيحودوا زى البنى ادمين

وان شد شمال
برضك قايمين بواجبهم وشوية

سوق ياسطى لحد الصبحية

خدامك انا والعربية

الجوز الخيل والعربية

انغامهم كلها حنية
بشتغلوا عليهم الالاتية

Template Designed by Douglas Bowman - Updated to New Blogger by: Blogger Team
Modified for 3-Column Layout by Hoctro