الحمد لله العظيم

الحمد لله

من 30 سنة

او من 40

او من

56

سنة ماكناش بنحلم بيوم زي ده

يوم مايكونش فيه حد وصي ع الشعب وع الشباب بالذات

ثورة ماحصلش زيها من أيام ثورة 1919

حتى من غير تدخل من الجيش

من غير مايكون فيه انقلاب عسكري زي اللي حصل في 54

ثورة حقيقية

دلوقت وأنا شاب من ضمن الشباب دي مطالبي :

* الرئيس مبارك لازم يقدم ضمانات على تعهده بعدم ترشحه تاني

* فتحي سرور وصفوت الشريف لازم يرحلوا مع النظام القديم

* ممنوع دخول أي رجل أعمال مجلس الشعب أو الشورى أو الحكومة

* ممنوع على الوزراء الانتماء لأي حزب سياسي وخصوصا الحزب الحاكم

* الست عيشة وزيرة القوى العاملة لازم ترحل لأنها لا حلت ولا ربطت في مشاكل العمال ولا جابتلهم حقوقهم وكل همها تحويل وزارة القوى العاملة إلى مكتب مخدمات لتصدير الخادمات لدول الخليج وكمان بأجر أقل من البلاد الأسيوية

* سامح فهمي المشارك في تصدير الغاز لاسرائيل واهدار موارد مصر من الغاز لازم يرحل

* لازم حد من مكتب نائب الرئيس ينزل للمحتجين في الشارع ويشوف مطالبهم لأنهم مالهومش ممثل والاحزاب المعارضة الضعيفة لا تمثل الشعب بأي صورة

* لازم نخرج من عهد حكومة العجائز وندي فرصة للشباب المشاركة في الحكومة

* لازم تكون الحكومة مدنية وكذلك المحافظين ورؤساء الأحياء والمجالس المحلية وممنوع على أي عسكري المشاركة في الحكومة أو شغل أي منصب غير عسكري

* رؤساء مجالس الادارات في الشركات الحكومية لازم يكونو متخصصين ودارسين علم الادارة

* رئيس الحكومة والوزراء المعنيين بالاقتصاد لازم يكونوا اقتصاديين

* قانون الطوارئ لازم يتلغي

* قانون الطوارئ لازم يتلغي

* قانون الطوارئ لازم يتلغي

أخيرا كلمتي للمنافقين من الحزب الوطني باقلهم ماتفتكروش ان الناس هبل وعبط علشان يصدقوا اللي بتحاولوا تعملوه من مظاهرات مؤيدة للنظام كل ما هنالك انكوا عايزين التورتة اللي كنتو بتنهبوا فيها تفضل موجودة ويفضل حاميها ارحلوا بقى عننا وبطلوا وجع دماغ