اليومين دول فيه موضة واخدة الكل و كل الناس بتتكلم فيها و بقت لبانة فى بق كل واحد
اللبانة دى اقصد الموضة دى هى التقريب بين السنة و الشيعة و يتكلم فيها اللى يسوى و اللى ما يسواش و عاملينلها مؤتمر فى الدوحة حاضره عن السنة الشيخ يوسف القرضاوى و عن الشيعة اية الله تسخيرى الايرانى
و فى المؤتمر ده بيحاولوا يوهمونا ان الشيعة مذهب زى اى مذهب سنى يعنى عايزين يعملوه زى المذهب الحنفى و المالكى و الشافعى و الحنبلى
طيب ايه هو تعريف المذهب و ايه هى المذاهب الاربعة و الفرق بينهم علشان نعرف ايه الفرق بينهم و بين المذهب الشيعى؟؟
اولا احب اوضح ان دين الاسلام له ناحيتين اساسيتين و هما العقائد و العبادات
و ان اختلاف المذاهب الاربعة السنية فى جانب العبادات و ما بيختلفوش فى جانب العقائد و هى الشئ الثابت اللى بيفرق بين المسلم و غير المسلم
العقيدة او الايمان خمسة اركان و هى الايمان بالله و كتبه و رسله و ملائكته و بالقضاء خيره و شره و دى شئ متفق عليه كل الفقهاء فى المذاهب الاربعة و الاختلاف فى الناحية دى يخرج من الملة
اما الناحية الفقهية او جانب العبادات و المعاملات اللى فيه اختلافات كتيرة بين المذاهب لاتخرج من الملة و انما هو رحمة لينا زى ما قال الامام مالك لأن فيه تيسير كتير ع المسلمين
طيب ايه سبب الاختلافات دى؟
سببها حاجتين اساسيتين : السبب الاول ان من الممكن ان يكون هناك حديث صحيح وصل لأمام فيأخذ بيه و يفتى بناءا عليه و ما وصلش للتانى او وصله و لقى فيه ضعف فمايعملش بيه
السبب الثانى هى اختلاف مصادر التشريع بينهم يعنى ايه؟
يعنى ان عالم الدين علشان يفتى فى مسألة او يصدر حكم عليها لازم يكون اخذ فتواه من دليل قوى مش من رأيه الخاص و الادلة دى متعددة
زى ايه؟
زى القران و السنة و كل المذاهب بتقدمهم على كل الادلة و ده مفيهوش اختلاف
يعنى الفقيه او العالم لما يصدر حكم معين يشوف القران صدر فيه الحكم ده و الا لأ؟ لو لقى يبقى ياخد بيه و مايلتفتش لغيره و لو مالاقاش الحكم ده يشوف السنة و هى الاحاديث الصحيحة المنقولة عن النبى صلى الله عليه و سلم
طيب لو مالقاش فى الاتنين؟
يبقى ييجى هنا مصادر اخرى بيختلف فى ترتيبها الفقهاء و اختلاف الترتيب ده (طبعا الترتيب بعد القران و السنة) هو سبب اختلاف الفقهاء
من امثلة المصادر دى فتاوى الصحابة و القياس
المذهب الحنبلى مثلا لا يعترف بالقياس او بياخد بيه فى اضيق الحدود و المذهب الحنفى بيتوسع فى استخدام القياس و القياس ده يعنى لو فيه مسألة ملهاش دليل و فيه مسألة تانية متشابهة معاها نبقى نحكم على التانية نفس الحكم
زى مسألة المخدرات حكمها التحريم قياسا على الخمر لأنها مشتركة معاها فى نفس العلة و هى ذهاب العقل
و المصدر التانى اللى الفقهاء الاربعة بياخدوا بيه و هو السنة يعنى كل حديث صحيح و صلنا و اتفقوا على كتب معينة شاملة لمعظم الادلة المستخدمة فى التشريع و هى الكتب الستة و هى صحيح البخارى و صحيح مسلم و سنن الترمذى و النسائى و ابن ماجه و سنن ابى داود
و البخارى و مسلم اصح كتابين بعد القران باتفاق العلماء يعنى انهم شاملين الاحاديث الصحيحة بس بعكس الكتب الاربعة التانية اللى ممكن تشتمل على الصحيح و الضعيف
و الشيعة بقى مابتعترفش بالسنة النبوية بتاعتنا يعنى ما بتعترفش بالاحاديث الصحيحة اللى هى المصدر الثانى للتشريع يعنى هدمت ركن اساسى من الشريعة الاسلامية اللى من غيرها تبقى فيه احكام كتييييييييييير مالهاش اساس
ما بيعترفوش الا بالاحاديث المنقولة عن الشيعة فقط و ما قلة هذه الاحاديث ناهيك عن ضعف معظمها ان لم يكن كذبه
يبقى ماينفعش نعمل مذهب خامس من غير السنة النبوية و هى المصدر الثانى الاساسى و اللى قائم عليه المذاهب الاربعة
والشيعة مابتاخدش بفتاوى الصحابة و الذى يعتبر المصدر الثالث للتشريع لأنهم ببساطة بيلعنوهم بالذات ابى بكر و عمر لأن فى رأيهم ان الصحابة ما نفذوش وصية الرسول بولاية على
طيب ما هو على و فاطمة رضى الله عنهما بايعوا لابى بكر و عمر و عثمان رضى الله عنهم اجمعين
و هل الصحابة كلهم غلطوا لما بايعوا ليهم؟ يعنى الشيعة اللى همه لا صحابة و لا تابعين هيبقوا احسن من الصحابة و هيعرفوا اللى معرفهوش؟ تيجى ازاى؟
اما من ناحية العقائد فعقيدتنا ان نؤمن بالله و رسله و لانفرق بين احد من رسله و ان الرسل معصومون فقط يعنى مافيش
بشر معصوم الا الانبياء و ده اللى مختلفين فيه مع الشيعة اللى بيعتبروا ائمتهم معصومون و بيعتبروا ان الوحى ما انقطعش بموت الرسول صلى الله عليه و سلم
يبقى الناس دول بينفخوا فى قربة مقطوعة و الا لأ؟
يا عالم ارحمونا بقى سيبوا الدين فى حاله
ملحوظة : المراجع اللى جبت منها الكلام ده كتير منها كتب العقائد زى شرح العقيدة الطحاوية لابن عز و فيه كتاب جميل لابن الجوزى و هو تلبيس ابليس فيه كلام كتير عن الفرق الشاذة وامور الفقه عن كتب الفقه للمذاهب الاربعة و كتب اصول الفقه و القواعد الفقهية مثل القواعد الفقهية للشيخ محمد بكر اسماعيل
اسمع عن عقائد الشيعة للشيخ أسامة سليمان
تعديل: خطبة أخرى اكثر من رائعة تكشف عقيدة الشيعة من كتبهم
تعديل: اقرأ نبذة عن الشيعة
